दहावी परीक्षेत यश मिळवलेल्या विद्यार्थ्यांचा रोख पारितोषिक देऊन सन्मान; मार्गदर्शक शिक्षिका शामल सावंत यांचा विशेष बहुमान
सावंतवाडी, दि.१५ : येथील नामांकित ‘जनसेवा निधी बांदा’ या सामाजिक संस्थेच्या वतीने दरवर्षीप्रमाणे यंदाही शालांत (दहावी) परीक्षेत उल्लेखनीय व लक्षणीय यश संपादन करणाऱ्या गुणवंत विद्यार्थ्यांचा भव्य गुणगौरव समारंभ नुकताच संपन्न झाला. खेमराज हायस्कूल बांदा येथील सभागृहात आयोजित करण्यात आलेल्या या कार्यक्रमात विविध विषयांत विशेष प्राविण्य मिळविणाऱ्या विद्यार्थ्यांना मान्यवरांच्या हस्ते रोख परितोषिके व प्रशस्तीपत्र देऊन गौरविण्यात आले. यावेळी जनसेवा निधी बांदा ट्रस्टचे अध्यक्ष डॉ. मिलिंद खानोलकर, उपाध्यक्ष हेमंत खानोलकर, मराठी पाठ्यपुस्तक निर्मिती राज्य सदस्य भरत गावडे, खेमराजचे मुख्याध्यापक प्रमोद सावंत आणि जनसेवा निधीचे सचिव गुरुनाथ नार्वेकर आदी मान्यवर व्यासपीठावर उपस्थित होते.
यंदाच्या शालांत परीक्षेत खेमराज हायस्कूलच्या तब्बल २२ विद्यार्थ्यांनी संस्कृत विषयात १०० पैकी १०० (पैकीच्या पैकी) गुण प्राप्त करत विद्यालयाच्या शिरपेचात मानाचा तुरा रोवला. विद्यार्थ्यांच्या या अभूतपूर्व यशामागे महत्त्वाचा वाटा असणाऱ्या आणि त्यांना उत्कृष्ट मार्गदर्शन करणाऱ्या विषय शिक्षिका शामल सावंत यांचा संस्थेच्या वतीने विशेष सन्मान करण्यात आला. संस्कृत विषयात दैदिप्यमान यश मिळविणाऱ्या कु. अथर्व जय भोसले, रिया दीपक देसाई, सेवा सचिन देसाई, अनुष्का पंकज पावसकर, धारा सुशांत ठाकूर, आर्यन महादेव नागवेकर, रिद्धी संतोष तावडे, निखिल भिवाजी देसाई, ईश्वरी संतोष वावळीये, अदिती दत्तप्रसाद मेस्त्री, नित्या अजय महाजन, शिवा संदेश सावंत, मानसी रत्नकांत चव्हाण, तनिष्का प्रशांत चिंदरकर, युतिका हरेश मळगावकर, सारा शाहिद शेख, ऋतुजा जयवंत पावसकर, स्वामी राजेश पावसकर, अंतरा प्रवीण मेस्त्री, रितेश राजेंद्र सावंत, श्रुती रविशंकर कुडव आणि आर्या अंकुश ठाकुर या सर्व २२ गुणवंतांना रोख पारितोषिक देऊन प्रोत्साहित करण्यात आले.
या सोहळ्यात संस्कृतमधील यशस्वी विद्यार्थ्यांबरोबरच इतर शाळा व विषयांत प्रथम आलेल्या विद्यार्थ्यांचाही योग्य सन्मान करण्यात आला. यामध्ये बांदा विभागातून दहा
वी परीक्षेत प्रथम येण्याचा बहुमान मिळवलेली कु. दुर्वा मुनेश वारंग, मडूरा हायस्कूलमधून प्रथम आलेली खुशी मंगेश पेडणेकर आणि कुडासे हायस्कूलमधून प्रथम क्रमांक पटकावणारी पूर्वा प्रमोद कुडासकर यांचा गौरव करण्यात आला. विषयनिहाय यशामध्ये समाजशास्त्र विषयात प्रथम आलेली दुर्वा मुनेश वारंग, विज्ञान विषयात प्रथम आलेला सुयश गावकर, गणित विषयात संयुक्तरित्या प्रथम क्रमांक मिळवलेल्या साक्षी गवंडी व अनुष्का मेस्त्री, मराठी विषयात प्रथम ईश्वरी वावळीये आणि इंग्रजी विषयात प्रथम निखिल देसाई या सर्व गुणवंतांना रोख पारितोषिके देऊन सन्मानित करण्यात आले.
याप्रसंगी बोलताना मुख्याध्यापक प्रमोद सावंत, शिक्षिका शामल सावंत आणि पालक प्रतिनिधी जय भोसले यांनी आपले मनोगत व्यक्त करत जनसेवा निधी संस्थेच्या या स्तुत्य उपक्रमाचे मनापासून कौतुक केले. अशा उपक्रमांमुळे विद्यार्थ्यांना पुढील वाटचालीस मोठे प्रोत्साहन मिळते, असे प्रतिपादन त्यांनी केले. कार्यक्रमाचे नेटके सूत्रसंचालन संस्थेचे सचिव गुरुनाथ नार्वेकर यांनी केले, तर उपस्थितांचे आभार उपाध्यक्ष हेमंत खानोलकर यांनी मानले. या सोहळ्याला विद्यार्थी, पालक आणि शिक्षक मोठ्या संख्येने उपस्थित होते.