शिक्षण प्रसारक मंडळाचे अध्यक्ष विक्रांत सावंत यांच्या अध्यक्षतेखाली राणी पार्वतीदेवी हायस्कूलमध्ये विविध कार्यक्रमांचे आयोजन; मान्यवरांची राहणार प्रमुख उपस्थिती.
*सावंतवाडी,दि. १४ : शिक्षण, राजकारण, अर्थकारण आणि समाजकारण अशा विविध क्षेत्रांत आपल्या कार्यकर्तृत्वाचा अमिट ठसा उमटविणारे आणि सर्वसामान्यांच्या सुख-दुःखाशी घट्ट नाळ जोडणारे मार्गदर्शक स्व. विकासभाई भालचंद्र सावंत यांच्या प्रथम स्मृतिदिनानिमित्त सावंतवाडीत ‘विकासभाई – एक आश्वासक पर्व’ या भावपूर्ण स्मरणसोहळ्याचे आयोजन करण्यात आले आहे. हा सोहळा बुधवार, दि. १५ जुलै २०२६ रोजी सकाळी १०.०० ते ११.३० या वेळेत सावंतवाडी येथील राणी पार्वतीदेवी हायस्कूल व ज्युनिअर कॉलेजच्या ‘नवरंग कलामंच’ येथे संपन्न होणार आहे. शिक्षण प्रसारक मंडळ, सावंतवाडीचे अध्यक्ष माननीय विक्रांत विकासभाई सावंत यांच्या अध्यक्षतेखाली या संपूर्ण कार्यक्रमाचे नेटके आयोजन करण्यात आले आहे.
स्व. विकासभाई सावंत यांचा २० जून १९६३ ते १५ जुलै २०२५ हा जीवनप्रवास केवळ एका व्यक्तीपुरता मर्यादित नसून तो समाजाशी बांधिलकी जपणाऱ्या एका दूरदृष्टीच्या आणि आश्वासक नेतृत्वाचा प्रवास होता. पद कोणतेही असो, त्यांच्या कार्याच्या केंद्रस्थानी नेहमी ‘माणूस’ राहिला. सर्वसामान्यांच्या अडचणी समजून घेणे, गरजूंच्या मदतीला धावून जाणे आणि प्रत्येकाशी आपुलकीचे नाते निर्माण करणे ही त्यांच्या व्यक्तिमत्त्वाची खरी ओळख होती. त्यांच्या जाण्याला आज एक वर्ष पूर्ण होत असले, तरी त्यांनी पेरलेले विचार, जपलेली मूल्ये आणि जोडलेली माणसे आजही त्यांच्या अस्तित्वाची प्रकर्षाने जाणीव करून देत आहेत. त्यांचे हेच विचार आणि सामाजिक बांधिलकीची मूल्ये नव्या पिढीपर्यंत पोहोचविण्याच्या व्यापक उद्देशाने या स्मरणसोहळ्याचे आयोजन करण्यात आले आहे.
या भावपूर्ण सोहळ्याला शिक्षण प्रसारक मंडळ, सावंतवाडीचे उपाध्यक्ष डॉ. दिनेश नागवेकर, सचिव व्ही. बी. नाईक, खजिनदार सी. एल. नाईक, शालेय समिती अध्यक्ष अमोल सावंत यांच्यासह संस्थेचे सन्माननीय सदस्य प्रा. सतीश बागवे, संदीप राणे, चंद्रकांत सावंत, वसुधा मुळीक, छाया सावंत आणि स्नेहा परब यांची प्रमुख उपस्थिती लाभणार आहे. तसेच संस्थेचे आजी-माजी मुख्याध्यापक, उपमुख्याध्यापक, उपप्राचार्य, पर्यवेक्षक, प्राध्यापक, शिक्षक, शिक्षकेतर कर्मचारी, विद्यार्थी, माजी विद्यार्थी आणि स्व. विकासभाई सावंत यांच्या विचारांशी जोडलेले असंख्य हितचिंतक व नागरिक या प्रसंगी उपस्थित राहणार आहेत.
कार्यक्रमाच्या नियोजित रूपरेषेनुसार, बुधवारी सकाळी ठीक १०.०० वाजता स्व. विकासभाई सावंत यांच्या प्रतिमेस मान्यवरांच्या हस्ते पुष्पांजली अर्पण करून कार्यक्रमाची सुरुवात होईल. त्यानंतर सकाळी १०.०५ वाजता गुणवंत विद्यार्थ्यांना बक्षीस वितरण करण्यात येईल. ठीक १०.३० वाजता मान्यवरांची स्मरणपर भाषणे होतील, तर सकाळी ११.२० वाजता अध्यक्षीय भाषण होईल. शेवटी ११.२७ वाजता आभार प्रदर्शन करून या कार्यक्रमाची सांगता केली जाईल. स्व. विकासभाई सावंत यांच्या पावन स्मृतींना विनम्र अभिवादन करण्यासाठी या सोहळ्यास सर्व हितचिंतक आणि नागरिकांनी बहुसंख्येने उपस्थित राहावे, असे आवाहन मुख्याध्यापक संप्रवी कशाळीकर, प्रभारी मुख्याध्यापक डॉ. सुमेधा नाईक, प्रभारी उपप्राचार्य सविता माळगे, पर्यवेक्षक नामदेव मुठे तसेच शाळेच्या सर्व प्राध्यापक, शिक्षक आणि शिक्षकेतर कर्मचाऱ्यांनी केले आहे.