देवस्थान समितीकडून भाविकांना दर्शनासह महाप्रसादाचा लाभ घेण्याचे आवाहन
सावंतवाडी, दि.१३: येथील न्यू सबनीसवाडा येथील श्री वासुदेवानंद सरस्वती (एकमुखी दत्त) मंदिरात बुधवार, १५ जुलै २०२६ रोजी श्री टेंबे स्वामी पुण्यतिथी उत्सव अत्यंत भक्तिभावाने साजरा करण्यात येणार आहे. या निमित्ताने मंदिरात दिवसभर विविध धार्मिक आणि सांस्कृतिक कार्यक्रमांचे आयोजन करण्यात आले असून, परिसरातील भाविकांनी या सोहळ्याला मोठ्या संख्येने उपस्थित राहून स्वामींचे दर्शन व महाप्रसादाचा लाभ घ्यावा, असे आवाहन श्री दत्तमंदिर व वासुदेवानंद सरस्वती मंदिर स्थानिक व्यवस्थापन समितीने केले आहे.
उत्सवाच्या निमित्ताने बुधवारी सकाळी ७ वाजता एकमुखी दत्तपूजा, एकादशी व लघुरुद्र पठणाने कार्यक्रमाची सुरुवात होईल. त्यानंतर सकाळी ९ वाजता श्री सत्यदत्त महापूजा बांधण्यात येणार आहे. दुपारी १२.३० वाजता श्रींची आरती झाल्यानंतर ठीक १ वाजता भाविकांसाठी महाप्रसादाचे आयोजन करण्यात आले आहे.
यानंतर सायंकाळच्या सत्रात ७ वाजता आरती होईल आणि ७.३० वाजता मंदिराच्या आवारात श्री टेंबे स्वामींचा भव्य पालखी सोहळा रंगणार आहे. रात्री ८.३० वाजता भजनाच्या कार्यक्रमाने या धार्मिक महोत्सवाची सांगता होईल. या मंदिरात दररोज सायंकाळी ७ वाजता नियमित नामस्मरण व आरती होत असल्याची माहितीही व्यवस्थापन समितीने दिली आहे. दरम्यान, ज्या भाविकांना महाप्रसादासाठी धान्य स्वरूपात शिधा द्यायचा आहे, त्यांनी १३ जुलै २०२६ पर्यंत मंदिरात शिधा जमा करावा, असे आवाहनही संयोजकांच्या वतीने करण्यात आले आहे.