११ जुलै रोजी अहमदाबाद येथे होणार अंतिम लढत; ‘फार्मा कौन्सिल ऑफ इंडिया’तर्फे मिळणार मोफत सुविधा
सावंतवाडी,दि.०८: फार्मसी क्षेत्रातील विद्यार्थ्यांच्या संशोधक वृत्तीला आणि नाविन्यपूर्ण कल्पनांना प्रोत्साहन देणाऱ्या ‘फार्मा अन्वेषण’ उपक्रमांतर्गत कोकण आणि पश्चिम महाराष्ट्रातील विद्यार्थ्यांनी घवघवीत यश संपादन केले आहे. महाराष्ट्र-गोवा विभागासाठी आयोजित करण्यात आलेल्या अत्यंत चुरशीच्या राज्यस्तरीय स्पर्धेतून एकूण नऊ विद्यार्थ्यांची राष्ट्रीय स्तरावरील अंतिम फेरीसाठी निवड झाली आहे. ही मानाची राष्ट्रीय अंतिम फेरी ११ जुलै २०२६ रोजी गुजरात मधील अहमदाबाद येथील एल. एम. कॉलेज ऑफ फार्मसी येथे रंगणार आहे.
प्रा. एम. एल. श्रॉफ यांच्या स्मृतिप्रीत्यर्थ देशभरात राबवल्या जाणाऱ्या या उपक्रमांतर्गत, महाराष्ट्र-गोवा विभागाची राज्यस्तरीय स्पर्धा सावंतवाडी येथील यशवंतराव भोसले कॉलेज ऑफ फार्मसीमध्ये उत्साहात पार पडली. या स्पर्धेतून निवड झालेले गुणवंत विद्यार्थी आता राष्ट्रीय पातळीवर महाराष्ट्र आणि गोवा विभागाचे अधिकृत प्रतिनिधित्व करणार आहेत. या संपूर्ण उपक्रमाचे महाराष्ट्र-गोवा विभागाचे मुख्य समन्वयक म्हणून सावंतवाडी फार्मसी महाविद्यालयाचे प्राचार्य डॉ. विजय जगताप यांनी यशस्वी जबाबदारी सांभाळली. तर विद्यार्थ्यांना डॉ. रोहन बारसे, डॉ. तुषार रुकारी, प्रा. गौरी भिवशेट आणि प्रा. गायत्री आठलेकर यांचे बहुमूल्य मार्गदर्शन लाभले.
राष्ट्रीय स्तरावर चमकण्यासाठी सज्ज झालेल्या पात्र विद्यार्थ्यांमध्ये साजन कांबळी, समीक्षा मेस्त्री, हर्षल सूर्यवंशी, सानिया शेख, अपूर्वा कामत, महादेव धुरी, श्रुती किल्लेदार, केतकी धणे आणि जुई पाटील यांचा समावेश आहे. हे विद्यार्थी यशवंतराव भोसले कॉलेज ऑफ फार्मसी (सावंतवाडी), विजयराव नाईक कॉलेज ऑफ फार्मसी (कणकवली), भारती विद्यापीठ (कोल्हापूर), इंदिरा इन्स्टिट्यूट ऑफ फार्मसी (साडवली) आणि गोविंदराव निकम कॉलेज ऑफ फार्मसी (सावर्डे) या नामांकित महाविद्यालयांचे प्रतिनिधित्व करत आहेत.
फार्मसी कौन्सिल ऑफ इंडियाच्या विशेष निर्णयानुसार, अहमदाबाद येथील राष्ट्रीय अंतिम फेरीत देशभरातून सहभागी होणाऱ्या सर्व १०८ विद्यार्थ्यांना मोफत नोंदणी, प्रवास आणि निवासाची उत्तम सुविधा उपलब्ध करून दिली जाणार आहे. या राष्ट्रीय स्पर्धेत उत्कृष्ट कामगिरी करणाऱ्या प्रथम क्रमांकाच्या विजेत्याला २१ हजार रुपये, द्वितीय क्रमांकाला ११ हजार रुपये आणि तृतीय क्रमांकाला ५ हजार रुपयांचे रोख पारितोषिक व आकर्षक ट्रॉफी देऊन गौरविण्यात येणार आहे.
विद्यार्थ्यांच्या या दैदीप्यमान यशाबद्दल श्री यशवंतराव भोसले एज्युकेशन सोसायटीचे कार्यकारी अध्यक्ष अच्युत सावंत भोसले, अध्यक्षा ऍड. अस्मिता सावंतभोसले आणि सचिव संजीव देसाई यांनी सर्व पात्र विद्यार्थ्यांचे विशेष अभिनंदन केले असून, राष्ट्रीय पातळीवर यश संपादन करण्यासाठी त्यांना मनापासून शुभेच्छा दिल्या आहेत. या यशामुळे संपूर्ण जिल्ह्यातून आणि फार्मसी क्षेत्रातून त्यांच्यावर कौतुकाचा वर्षाव होत आहे.