कुडाळ शासकीय विश्रामगृह येथे पदाधिकारी व कार्यकर्त्यांची सभा संपन्न
कुडाळ,दि.०५: बेलदार भटका समाजाचे राज्याध्यक्ष रमेश जाधव यांच्या प्रमुख उपस्थितीत आज कुडाळ येथील शासकीय विश्रामगृहात सिंधुदुर्ग जिल्ह्यातील बेलदार भटका समाज संघटनेच्या प्रमुख पदाधिकारी व कार्यकर्त्यांची सभा उत्साहात पार पडली. या सभेमध्ये संघटनेच्या विविध उपक्रमांचा सविस्तर आढावा घेण्यात आला, तसेच समाजाच्या सर्वांगीण विकासासाठी पुढील वाटचालीबाबत महत्वपूर्ण चर्चा करण्यात आली.
या सभेत बोलताना राज्याध्यक्ष रमेश जाधव यांनी सिंधुदुर्ग जिल्ह्यात स्थापन झालेली बेलदार भटका समाज संघटना ही राज्यातील पहिली नोंदणीकृत (रजिस्टर) संघटना असून, तिचे कार्य इतर जिल्ह्यांतील संघटनांसाठी अत्यंत आदर्शवत असल्याचे गौरवोद्गार काढले. समाज संघटित झाल्यास विकासाची गती निश्चितपणे वाढेल, यावर भर देत त्यांनी जिल्ह्यातील सर्व पदाधिकारी व कार्यकर्त्यांनी एकदिलाने संघटनेचे काम करावे, असे आवाहनही केले. जिल्ह्यात समाजाच्या कोणत्याही कामात अडचण आल्यास राज्य संघटना सदैव तत्परतेने समाजाच्या पाठीशी उभी राहील आणि समाजहितासाठी आवश्यक असलेली प्रत्येक मदत राज्यस्तरावरून केली जाईल, अशी ग्वाही त्यांनी दिली. तसेच समाजातील युवक, विद्यार्थी आणि सर्व घटकांना मुख्य प्रवाहात आणण्यासाठी सातत्याने प्रयत्न करण्यात येतील, असेही त्यांनी यावेळी स्पष्ट केले.
या प्रसंगी समाजात भेडसावणारा सर्वात महत्त्वाचा प्रश्न म्हणजेच जात वैधता व जातीच्या दाखल्याचा मुद्दा त्यांनी प्रकर्षाने उपस्थित केला. अनेक समाजबांधवांसाठी १९६१ पूर्वीच्या पुराव्याची अट ही खूप मोठी अडचण ठरत असल्याचे सांगत, या गंभीर विषयावर मुख्यमंत्री तसेच संबंधित खात्याच्या मंत्र्यांशी आणि विभागाशी चर्चा करून सिंधुदुर्ग जिल्ह्यात लवकरच एका स्वतंत्र विशेष शिबिराचे आयोजन करण्यात येईल, असे आश्वासन त्यांनी दिले. जिल्हाध्यक्षांच्या समन्वयातून हे शिबिर घेऊन समाजबांधवांना जातीचे दाखले विनासायास मिळावेत आणि ही कायदेशीर समस्या कायमस्वरूपी मार्गी लागावी, यासाठी राज्य संघटना कटिबद्ध राहील, असे त्यांनी सांगितले.
दरम्यान, आगामी ऑगस्ट महिन्यात एका भव्य जिल्हास्तरीय मेळाव्याचे आयोजन करण्यात येणार असून, यामध्ये विविध क्षेत्रांत उल्लेखनीय कामगिरी करणारे समाजातील गुणवंत विद्यार्थी, क्रीडापटू, यशस्वी व्यावसायिक आणि समाजासाठी मोलाचे योगदान देणाऱ्या मान्यवरांचा विशेष गौरव करण्यात येणार असल्याची माहितीही त्यांनी दिली. या गौरव सोहळ्याच्या आणि मेळाव्याच्या माध्यमातून संघटनेला एक नवी दिशा देत, समाजाच्या उज्ज्वल प्रगतीसाठी अधिक प्रभावीपणे काम केले जाईल, असा दृढ विश्वास राज्याध्यक्ष रमेश जाधव यांनी यावेळी व्यक्त केला.
यावेळी बेलदार भटका समाज संघ,महाराष्ट्र राज्य कार्याध्यक्ष संजय चव्हाण,सिंधुदुर्ग जिल्हाध्यक्ष मारूती मोहिते,उपाध्यक्ष गणेश जाधव,सचिव महादेव पवार सल्लागार वसंत जाधव, सदस्य किरण चव्हाण,रोहिदास पवार,विकास जाधव,रोशन चव्हाण,अशोक मोहिते,रमेश पवार,बाळकृष्ण जाधव,दिनेश जाधव,रावसाहेब पवार,अंकुश पवार,सतिश पवार,श्रीम.पुजा जाधव,वैभव मोहिते आदी जिल्ह्यातील बेलदार भटका समाज संघटनेचे अनेक प्रमुख पदाधिकारी आणि कार्यकर्ते मोठ्या संख्येने उपस्थित होते.