माजी विद्यार्थी विठ्ठल सावंत यांच्याकडून सामाजिक बांधिलकी; १५ वर्षांचा अविरत उपक्रम
सावंतवाडी, दि.०४: येथील कलंबिस्त इंग्लिश स्कूलमधील गरजू आणि होतकरू विद्यार्थ्यांना शैक्षणिक साहित्य उपलब्ध व्हावे, या उद्देशाने प्रशालेचे माजी विद्यार्थी तथा मळगाव हायस्कूलचे पर्यवेक्षक श्री. विठ्ठल रामचंद्र सावंत यांच्या वतीने १० डझन वह्यांचे मोफत वितरण करण्यात आले. ग्रामीण भागातील विद्यार्थ्यांना शिक्षणासाठी प्रोत्साहन मिळावे म्हणून श्री. सावंत यांच्याकडून दरवर्षी हा स्तुत्य उपक्रम राबवला जातो.
या वह्यांचे वितरण विठ्ठल सावंत यांचे वडील तथा कलंबिस्त हायस्कूलचे सेवानिवृत्त चतुर्थ श्रेणी कर्मचारी रामचंद्र सावंत यांच्या हस्ते करण्यात आले. आपल्याच माजी कर्मचाऱ्याच्या आणि विद्यार्थ्याच्या हस्ते हा कार्यक्रम पार पडल्याने प्रशालेत एक वेगळाच आनंद पाहायला मिळाला. विशेष म्हणजे, विठ्ठल सावंत यांनी आपली सामाजिक बांधिलकी जपत गेली १५ वर्षे हा उपक्रम अविरतपणे सुरू ठेवला असून, दरवर्षी शैक्षणिक वर्षाच्या सुरुवातीलाच ते विद्यार्थ्यांना अशी मदत पोहचवत असतात.
त्यांच्या या सातत्यपूर्ण दातृत्वाबद्दल आणि सामाजिक कार्याबद्दल कलंबिस्त शिक्षण संस्थेचे अध्यक्ष शिवाजी सावंत, सचिव यशवंत राऊळ, सहसचिव चंद्रकांत राणे व सर्व संचालक मंडळाने त्यांचे विशेष कौतुक केले. तसेच मुख्याध्यापक अभिजीत जाधव, सर्व शिक्षक आणि शिक्षकेतर कर्मचारी यांनी श्री. सावंत यांचे आभार मानून त्यांच्या पुढील वाटचालीस शुभेच्छा दिल्या. विठ्ठल सावंत यांच्या या उपक्रमाचे सर्व स्तरांतून कौतुक होत आहे.