विकसित आणि समृद्ध कोकणासाठी युवा सामाजिक संस्थांचा निर्धार
देवगड,दि.०३: कोकणातील स्थानिक युवकांना रोजगार मिळणे हाच खऱ्या विकासाचा पाया आहे, हाच विचार घेऊन आणि कोकणातील युवकांच्या उज्ज्वल भविष्यासाठी येत्या रविवारी, ५ जुलै २०२६ रोजी देवगडमध्ये एका भव्य मोटारसायकल रॅलीचे आयोजन करण्यात आले आहे. ‘विकसित कोकण, समृद्ध कोकण’ हे ध्येय डोळ्यांसमोर ठेवून स्थानिक युवा सामाजिक संस्थांनी हा निर्धार केला असून, या रॅलीच्या माध्यमातून युवकांचा मोठा एल्गार पाहायला मिळणार आहे.
रविवार, ५ जुलै रोजी सकाळी ठीक १० वाजता जामसंडे येथील श्री दिरबादेवी स्टॉप येथून या भव्य मोटारसायकल रॅलीला सुरुवात होणार आहे. “फिरायला कोकणात यायचं, मग नोकरीला कोकणाच्या बाहेर का जायचं?” असा रोकडा सवाल करत, कोकणातील तरुणांचे स्थलांतर थांबवण्यासाठी आणि स्थानिक पातळीवरच रोजगाराच्या संधी उपलब्ध करून देण्यासाठी ही रॅली काढण्यात येत आहे. कोकणाचा विकास हा केवळ पर्यटनापुरता मर्यादित न राहता, तिथल्या तरुणांना मानाचे जीणे देणारा असावा, या मागणीसाठी ही रॅली एकजुटीचे प्रतीक ठरणार आहे.
या रॅलीदरम्यान पर्यावरणपूरक विकास प्रकल्प, स्वच्छ ऊर्जा, हरित व समृद्ध कोकण या संकल्पनांसह स्थानिकांना प्राधान्याने रोजगार मिळवून देणे या मुख्य मुद्द्यांवर जनजागृती केली जाणार आहे. औद्योगिक किंवा इतर प्रकल्पांबाबत होणाऱ्या चुकीच्या प्रचाराला बळी न पडता, युवकांनी आता स्वतःच्या हक्कासाठी जागृत होण्याची वेळ आली आहे, असा संदेश आयोजकांकडून दिला जात आहे. कोकणातील युवकांचा रोजगार आणि इथली संपत्ती दुसऱ्या राज्यात जाऊ नये, यासाठी सर्वांनी हेवेदावे बाजूला ठेवून एकत्र येण्याची गरज निर्माण झाली आहे.
ही रॅली कोणत्याही राजकीय हेतूने प्रेरित नसून संपूर्णपणे ‘एकजुटीसाठी आणि युवकांच्या भविष्यासाठी’ आयोजित करण्यात आली आहे. त्यामुळे देवगड आणि परिसरातील तमाम तरुणांनी, नागरिकांनी मोठ्या संख्येने आपल्या मोटारसायकलसह या रॅलीत सहभागी व्हावे आणि समृद्ध कोकणाच्या उभारणीसाठी आपली वज्रमूठ दाखवून द्यावी, असे जाहीर आवाहन आयोजकांनी केले आहे.