अखिल भारतीय गांधर्व महाविद्यालयाच्या परीक्षेत ४ विद्यार्थ्यांनी मिळवली प्रथम श्रेणी; संचालक व मुख्याध्यापकांकडून कौतुक
सावंतवाडी,दि.२: येथील प्रसिद्ध शैक्षणिक संस्था ‘स्टेपिंग स्टोन ग्लोबल स्कूल’च्या विद्यार्थ्यांनी अखिल भारतीय गांधर्व महाविद्यालयाच्या वतीने घेण्यात आलेल्या हार्मोनियम परीक्षेत उल्लेखनीय यश संपादन केले आहे. या परीक्षेत प्रशालेच्या एकूण चार विद्यार्थ्यांनी आपली सांगीतिक चमक दाखवत प्रथम श्रेणीत यश मिळवले असून, संस्थेच्या शिरपेचात मानाचा तुरा रोवला आहे.
महाविद्यालयातर्फे घेण्यात आलेल्या ‘प्रारंभिक’ परीक्षेत इयत्ता चौथीमधील कु. वल्लभ राऊळ, इयत्ता पाचवीमधील कु. खुश भाईडकर आणि इयत्ता सातवीमधील कु. गौरिश परब या तिन्ही विद्यार्थ्यांनी प्रथम श्रेणी प्राप्त करून संस्थेचा गौरव वाढवला. याचबरोबर, पुढील टप्पा असलेल्या ‘प्रवेशिका प्रथम’ परीक्षेत इयत्ता सातवीतील कु. ऋतुजा पेडणेकर हिने देखील प्रथम श्रेणी मिळवत आपल्या उत्कृष्ट कामगिरीची परंपरा कायम राखली.
विद्यार्थ्यांच्या या यशात त्यांना प्रशालेचे हार्मोनियम शिक्षक कपिल कांबळी यांचे मोलाचे मार्गदर्शन लाभले. त्यांच्या अथक परिश्रमामुळेच विद्यार्थ्यांनी हे यश संपादन केले असल्याचे बोलले जात आहे.
या सर्व यशस्वी विद्यार्थ्यांचे, त्यांच्या पाठीशी खंबीरपणे उभे राहणाऱ्या पालकांचे आणि मार्गदर्शक शिक्षक श्री. कांबळी यांचे संस्थेचे संचालक रुजुल पाटणकर व मुख्याध्यापिका सौ. प्राची साळगावकर यांनी मनःपूर्वक अभिनंदन केले. तसेच परीक्षेत सहभागी झालेल्या सर्वच विद्यार्थ्यांना त्यांच्या पुढील शैक्षणिक आणि सांगीतिक वाटचालीस संस्थेच्या वतीने भरभरून शुभेच्छा देण्यात आल्या. विद्यार्थ्यांच्या या यशामुळे सावंतवाडी परिसरातून त्यांच्यावर कौतुकाचा वर्षाव होत आहे.