सिंधुदुर्ग जिल्हा बँकेत ‘सहकार सप्ताह’ सोहळा संपन्न; नवीन बहुउद्देशीय सहकारी संस्थेची स्थापना
सिंधूनगरी, दि.२९: बहुउद्देशीय संस्थेमार्फत जिल्ह्यातील वेगवेगळ्या संस्थांना कमी खर्चात उत्तम प्रशिक्षण उपलब्ध होईल. यातून प्रशिक्षित कर्मचारी वर्ग वेगाने निर्माण होईल आणि त्यासाठी लागणाऱ्या सर्व सोयी-सुविधा व प्रशिक्षण केंद्रासाठी जिल्हा बँक पूर्ण मदत करेल. सहकार मंडळ आणि बहुउद्देशीय संस्था एकत्रितपणे जिल्ह्यातील संस्थांना पुढे घेऊन जाण्यास मदत करतील. सहकार क्षेत्रातील सर्व कार्यकर्त्यांनी एकत्र येऊन आपल्या अनुभवाच्या जोरावर जिल्ह्यातील सहकार अधिक समृद्ध करावा, असे प्रतिपादन सिंधुदुर्ग जिल्हा बँकेचे अध्यक्ष मनीष दळवी यांनी ओरस येथे केले.
भारत सरकारच्या सहकार मंत्रालयाच्या स्थापनेला पाच वर्षे पूर्ण झाल्याच्या निमित्ताने सिंधुदुर्ग जिल्हा बँकेत सहकार सप्ताह शुभारंभ सोहळा उत्साहात साजरा करण्यात आला. सहकार सप्ताहाचा शुभारंभ जिल्हा बँकेचे अध्यक्ष मनीष दळवी यांनी सहकार ध्वजारोहण करून केला. या दिनाचे औचित्य साधून ‘सिंधुदुर्ग जिल्हा बहुउद्देशीय सहकारी संस्था मर्यादित, सिंधुदुर्ग’ या नवीन संस्थेची स्थापना करण्यात आली. या नूतन संस्थेची पहिली सभा जिल्हा बँकेच्या प्रधान कार्यालयातील सभागृहात पार पडली. या सभेच्या अध्यक्षपदी मनीष दळवी यांची निवड करण्यात आली असून त्यांच्या हस्ते दीपप्रज्वलन करून सहकार अभियान कार्यक्रमाचा अधिकृत शुभारंभ झाला. कार्यक्रमाची सुरुवात पारंपरिक सहकार गीताने करण्यात आली. याप्रसंगी बहुउद्देशीय संस्थेच्या चेअरमनपदी संदेश हडकर यांची निवड करण्यात आली असून त्यांनी संस्थेचे उपविधी, कार्य आणि उद्देशांचे वाचन केले.
या सोहळ्याला माजी आमदार अजित गोगटे, सिंधुदुर्ग जिल्ह्याचे सहाय्यक निबंधक (कुडाळ) श्री. मरभळ, जिल्हा उपनिबंधक कार्यालय अधीक्षक श्री. हिरलेकर, कणकवली संस्था निबंधक श्री. आरेकर, तसेच जिल्हा बँकेचे संचालक गजानन गावडे, दिलीप रावराणे, रवींद्र मडगावकर, प्रकाश मोर्ये, विठ्ठल देसाई, सौ. प्रज्ञा ढवण, गणपत देसाई, समीर सावंत, विद्याप्रसाद बांदेकर, तुळशीदास रावराणे आणि नासीर काझी उपस्थित होते. याशिवाय जिल्हा बँकेचे मुख्य कार्यकारी अधिकारी अनिरुद्ध देसाई, उपमुख्य कार्यकारी अधिकारी प्रमोद गावडे, नूतन बहुउद्देशीय संस्थेचे कार्यवाह, संचालक मंडळ, सभासद आणि सहकार क्षेत्रातील मान्यवर मोठ्या संख्येने उपस्थित होते.
