पणजीत रंगला ‘सम्राट संगीत सितारा’ शास्त्रीय गायन स्पर्धेचा द्विदशकपूर्ती सोहळा; कर्नाटकचा पुतराज द्वितीय, तर गोव्याचा मल्हार तृतीय
सावंतवाडी, दि.२७: जागतिक संगीत दिनाचे औचित्य साधून सम्राट क्लब इंटरनॅशनल स्टेट-१ आयोजित आणि सम्राट क्लब माशेल यजमान असलेल्या ‘सम्राट संगीत सितारा २०२६’ या गोव्याच्या अत्यंत प्रतिष्ठित हिंदुस्थानी शास्त्रीय गायन स्पर्धेचा ग्रँड फिनाले दीनानाथ मंगेशकर कला मंदिर, कला अकादमी-पणजी येथे मोठ्या उत्साहात पार पडला. या प्रतिष्ठेच्या स्पर्धेत महाराष्ट्राच्या सिंधुदुर्ग जिल्ह्यातील हर्ष संजय नकाशे याने प्रथम क्रमांक पटकावून ‘सम्राट संगीत सितारा २०२६’ चा बहुमान मिळवला. गेली २० वर्षे शास्त्रीय संगीताचा प्रसार आणि नवोदित गायकांना हक्काचे व्यासपीठ उपलब्ध करून देण्याचे कार्य या स्पर्धेने यशस्वीरित्या केले आहे. यंदाच्या स्पर्धेत चार प्राथमिक फेऱ्या आणि उपांत्य फेरीतून निवड झालेल्या सहा अंतिम स्पर्धकांनी अंतिम फेरीत आपल्या गायन कौशल्याची अप्रतिम छाप पाडत रसिकांची मने जिंकली. या अटीतटीच्या स्पर्धेत कर्नाटकच्या गदग येथील पुतराज वेंकटपूरमठ याने द्वितीय, तर गोव्याच्या सांगे येथील मल्हार बाळकृष्ण मराठे याने तृतीय क्रमांक पटकावला.
या दिमाखदार सोहळ्याच्या उद्घाटन समारंभाला कला व संस्कृती मंत्री रमेश तवडकर प्रमुख पाहुणे म्हणून उपस्थित होते, तर प्रख्यात हिंदुस्थानी शास्त्रीय गायक पं. राम देशपांडे हे महागुरू व विशेष अतिथी म्हणून उपस्थित होते. तसेच समारोप व बक्षीस वितरण समारंभाचे प्रमुख पाहुणे म्हणून कला अकादमीचे अध्यक्ष चंद्रकांत उर्फ बाबू कवळेकर उपस्थित होते. स्पर्धा संपन्न झाल्यानंतर महागुरू पंडित राम देशपांडे यांच्या सुश्राव्य शास्त्रीय गायनाची मैफल रंगली आणि त्यांच्या स्वरांनी उपस्थित रसिक मंत्रमुग्ध झाले.
या सोहळ्याचे औचित्य साधून संस्थेच्या उभारणीत आणि सांस्कृतिक क्षेत्रात मोलाचे योगदान देणाऱ्या अनेक मान्यवरांचा विशेष सन्मान करण्यात आला. यामध्ये संस्थापक सम्राट सागर पानवेलकर, अक्षय खांडेपारकर, प्रसाद नाईक, योगेश हिरवे, भालचंद्र नाईक, दीपक टिळवे, गुरूदास नाटेकर, दीपक नार्वेकर, राजश्री खांडेपारकर, अविन नाईक, प्रसाद प्रभूगांवकर, अमोल फडते वेतकीकर, ॲड. अवधूत सलतकी, मंगेश गांवकर, अवधूत नाईक, पंकज नमशीकर, भालचंद्र नार्वेकर, अर्चना सिनारे, निखिल साळगांवकर आणि स्वप्ना मातोंडकर यांचा समावेश होता.
या कार्यक्रमाला सम्राट क्लबचे आंतरराष्ट्रीय कार्यकारी अध्यक्ष सम्राट संदीप निगळ्ये, राज्य १ चे अध्यक्ष सम्राट शशिकांत पुनाजी, सचिव सम्राट विनोद मळीक, कोषाध्यक्ष सम्राट सुबोध रामनाथकर आणि यजमान मार्सेल क्लबचे अध्यक्ष सम्राट रोहन घाडी उपस्थित होते. तसेच मये क्लबचे अध्यक्ष नरेश पेडणेकर, मंगेश गांवकर आणि सौ. स्वप्ना मातोंडकर यांच्यासह सम्राट क्लबचे अनेक पदाधिकारी, संगीतप्रेमी, शिक्षक व कलाकार मोठ्या संख्येने उपस्थित होते.