३४ वर्षांच्या प्रदीर्घ सेवेनंतर पदोन्नती आणि सेवानिवृत्ती; पोलीस निरीक्षक अमोल चव्हाण यांच्या हस्ते गौरव
सावंतवाडी, दि.२६:
येथील पोलीस ठाण्याचे नवनिर्वाचित पोलीस उपनिरीक्षक महेंद्र बांदेकर यांचा औदुंबर स्वामी समर्थ मंदिराच्या वतीने नुकताच सत्कार करण्यात आला. सावंतवाडी पोलीस ठाण्याचे पोलीस निरीक्षक अमोल चव्हाण यांच्या हस्ते त्यांना सन्मानित करण्यात आले. श्री. बांदेकर यांना नुकतीच पोलीस उपनिरीक्षक म्हणून बढती मिळाली असून या आनंदाच्या प्रित्यर्थ मंदिर समितीच्या वतीने या छोटेखानी सत्काराच्या कार्यक्रमाचे आयोजन करण्यात आले होते.
महेंद्र बांदेकर हे तब्बल गेली ३४ वर्षे सिंधुदुर्ग पोलीस दलात अत्यंत निष्ठेने कार्यरत आहेत. त्यांच्या या प्रदीर्घ आणि उल्लेखनीय सेवेची दखल घेत त्यांना नुकतीच पोलीस उपनिरीक्षक म्हणून पदोन्नती देण्यात आली आहे. विशेष म्हणजे, याच महिन्याच्या अखेरीस ते पोलीस खात्यातून सेवानिवृत्त होत आहेत. या पार्श्वभूमीवर औदुंबर स्वामी समर्थ मंदिराच्या वतीने त्यांचा विशेष सन्मान करून त्यांना पुढील भावी आयुष्यासाठी आणि सेवानिवृत्त जीवनासाठी मनःपूर्वक शुभेच्छा देण्यात आल्या.
या छोटेखानी आणि कौतुकास्पद सोहळ्याला पोलीस दल तसेच मंदिर उत्सव समितीतील अनेक मान्यवर आणि कार्यकर्ते मोठ्या संख्येने उपस्थित होते. यामध्ये पोलीस उपनिरीक्षक प्रमोद पाटील, पोलीस हवालदार गुरुदास नाईक, विलास नर, मयूर सावंत, आबा पिळणकर, निलेश परब तसेच उत्सव समितीचे अमोल टेंबकर, हेमंत पांगम, सचिन मोरजकर, भुवन नाईक, आनंद काष्टे, यश गाते, अक्षय माशाळ, नागेश पाटील, शुभम सावंत आणि श्रीरंग सावंत आदी कार्यकर्त्यांचा समावेश होता. उपस्थित सर्वांनीच श्री. बांदेकर यांच्या पोलीस दलातील सेवेचा गौरव करत त्यांना सदिच्छा दिल्या.