जिल्ह्याच्या विकासकामांना गती देण्याची दिली ग्वाही; पदाधिकारी व कार्यकर्त्यांशी साधला संवाद
कुडाळ,दि.२४: सिंधुदुर्ग जिल्ह्याच्या विकासकामांची संपूर्ण माहिती घेऊन, ती कामे जिल्हाधिकाऱ्यांकडे सुपूर्द करून प्राधान्याने पूर्ण केली जातील, अशी ग्वाही खासदार नारायण राणे यांनी दिली आहे. कुडाळ येथील महायुती कार्यालयाला खासदार नारायण राणे व नीलम राणे यांनी नुकतीच सदिच्छा भेट दिली, त्याप्रसंगी ते बोलत होते. या विशेष भेटीदरम्यान त्यांनी महायुतीच्या पदाधिकारी व कार्यकर्त्यांशी संवाद साधत विविध स्थानिक आणि राजकीय विषयांवर सविस्तर चर्चा केली.
या प्रसंगी कुडाळ येथील महायुती कार्यालयात उत्साहपूर्ण वातावरण पाहायला मिळाले. नारायण राणे यांच्या दौऱ्यानिमित्त कुडाळ तालुक्यातील महायुतीचे सर्व प्रमुख पदाधिकारी आणि कार्यकर्ते मोठ्या संख्येने उपस्थित होते. जिल्ह्यातील प्रलंबित प्रश्न मार्गी लावण्यासाठी आणि विकासकामांचा वेग वाढवण्यासाठी आगामी काळात प्रशासन आणि लोकप्रतिनिधींमध्ये समन्वय कसा साधला जाईल, यावरही यावेळी प्रामुख्याने चर्चा झाली. कार्यकर्त्यांच्या वतीने खासदार राणे यांचे जोरदार स्वागत करण्यात आले.
