कविलकाटे येथील बहुतांश भागातील ‘ग्रीन झोन’ अखेर उठवला!
कुडाळ,दि.१९: नगरपंचायत हद्दीतील मौजे कविलकाटे (वॉर्ड क्र. १) येथील शेतकऱ्यांची आणि नागरिकांची गेल्या अनेक वर्षांची प्रलंबित मागणी अखेर मार्गी लागली आहे. कुडाळ-मालवण विधानसभा मतदारसंघाचे आमदार निलेश राणे यांच्या विशेष प्रयत्नांमुळे या भागातील बहुतांश जमिनींवरील ‘ग्रीन झोन’ उठविण्यात आला आहे. या यशाबद्दल सामाजिक कार्यकर्ते तथा पत्रकार समिल जळवी यांनी नागरिकांच्या वतीने आमदार निलेश राणे यांची भेट घेऊन लेखी निवेदनाद्वारे त्यांचे विशेष आभार मानले.
कविलकाटे भागातील नागरिकांच्या अडचणी दूर करण्यासाठी समिल जळवी हे गेल्या दोन वर्षांपासून सातत्याने पाठपुरावा करत होते. यापूर्वी त्यांनी मुख्याधिकारी आणि जिल्हाधिकारी यांना अनेकदा लेखी निवेदने दिली होती, मात्र त्यातून ठोस मार्ग निघू शकला नव्हता. कुडाळ-मालवणचे आमदार म्हणून निलेश राणे निवडून आल्यानंतर, जळवी यांनी त्यांची तीन वेळा वेगवेगळ्या स्वरूपाची निवेदने सादर केली आणि गेल्या वर्षभरात सातत्याने या विषयाचा पाठपुरावा केला. तसेच ‘लोकसंवाद लाईव्ह न्यूज चॅनल’च्या माध्यमातूनही या समस्येला वेळोवेळी वाचा फोडून शासनाचे लक्ष वेधले होते. आमदार निलेश राणे यांनी या सर्व बाबींची गांभीर्याने दखल घेत केलेल्या विशेष प्रयत्नांमुळे अखेर हा ग्रीन झोन उठवण्यात आला आहे.
हा क्लिष्ट प्रश्न सुटल्यामुळे कविलकाटे भागातील शेतकरी आणि सर्वसामान्य नागरिकांमधून अत्यंत समाधान व्यक्त केले जात आहे. दरम्यान, कुडाळ येथील एका कार्यक्रमात समिल जळवी यांनी आमदार निलेश राणे यांची भेट घेतली आणि लेखी निवेदन देऊन नागरिकांच्या वतीने त्यांचे आभार मानले. यावेळी उर्वरित राहिलेल्या काही भागातील जमिनीवरील ग्रीन झोन उठवण्याबाबतही सकारात्मक चर्चा झाली. यावर बोलताना आमदार निलेश राणे यांनी, ज्या नागरिकांच्या भागात अजूनही ग्रीन झोन किंवा बाधित झोन कायम आहे, त्यांनी ८ जुलैपूर्वी नगरपंचायत कार्यालयात रीतसर अर्ज सादर करून आपल्या हरकती नोंदवाव्यात, जेणेकरून तांत्रिक त्रुटी दूर करून उर्वरित भागातील प्रश्नही निकाली काढता येईल, अशी हमी दिली. कित्येक वर्षे रखडलेला हा ग्रीन झोन उठल्यामुळे नागरिकांच्या अडचणी मोठ्या प्रमाणात कमी झाल्या असून, आमदार निलेश राणे यांनी यापुढेही या विभागातील समस्या सोडविण्यासाठी असेच सहकार्य करत राहावे, अशी भावना समिल जळवी यांनी यावेळी व्यक्त केली.