स्वामी नरेंद्रचार्यजी महाराजांच्या प्रेरणेने अवयव व देहदान चळवळीला गती; भावी डॉक्टरांच्या शिक्षणासाठी मदतीचा हात
सिंधुदुर्ग,दि.१८: जगदगुरु रामानंदाचार्य श्री स्वामी नरेंद्रचार्यजी महाराज यांच्या दिव्य प्रेरणेतून आज संपूर्ण भारतभर देहदान आणि अवयव दान चळवळ मोठ्या प्रमाणावर उभी राहिली आहे. याच चळवळीचा भाग म्हणून, रामानंदाचार्य संप्रदाय सिंधुदुर्गच्या वतीने आज शासकीय परिचर्या प्रशिक्षण महाविद्यालय, जिल्हा रुग्णालय सिंधुदुर्ग येथे ५ वे यशस्वी देहदान करण्यात आले.
या उपक्रमांतर्गत कै. गौरेश बाबू पेडणेकर यांचे देहदान त्यांच्या कुटुंबीयांच्या वतीने अत्यंत आदरपूर्वक करण्यात आले. वैद्यकीय क्षेत्रातील भावी डॉक्टर उत्तम प्रकारे घडावेत आणि त्यांना मानवी शरीराचा सखोल अभ्यास करता यावा, यासाठी मृतदेहांची अत्यंत आवश्यकता असते. हीच सामाजिक जाणीव ठेवून पेडणेकर कुटुंबीयांनी हे पाऊल उचलले, ज्याचे सर्वत्र कौतुक होत आहे.
“स्वामीजींच्या शिकवणुकीतून प्रेरणा घेऊन अनेक कुटुंबे आज देहदान आणि अवयव दानासाठी पुढे येत आहेत. समाजाप्रती असलेले हे ऋण फेडण्याचा आणि वैद्यकीय शिक्षणाला मदत करण्याचा हा एक पवित्र मार्ग आहे.”
या देहदान प्रक्रियेप्रसंगी रामानंदाचार्य संप्रदाय सिंधुदुर्ग जिल्हा कमिटीचे पदाधिकारी, सावंतवाडी तालुकाध्यक्ष तसेच संप्रदायाचे भक्तगण मोठ्या संख्येने उपस्थित होते. स्वामींच्या प्रेरणेतून सुरू असलेल्या या चळवळीमुळे सिंधुदुर्ग जिल्ह्यात देहदानाविषयी मोठी जनजागृती निर्माण होत असल्याचे चित्र पुन्हा एकदा अधोरेखित झाले आहे.