मे महिन्यातील वीज खंडित होण्याच्या त्रासामुळे नागरिक आक्रमक; लोकप्रतिनिधी आणि व्यापाऱ्यांना उपस्थित राहण्याचे आवाहन
सावंतवाडी,दि.०४: शहरातील वारंवार खंडित होणारा वीजपुरवठा, कमी दाबाने मिळणारी वीज तसेच नागरिकांना भेडसावणाऱ्या विविध समस्यांच्या पार्श्वभूमीवर नवनिर्वाचित आमदार प्रमोद जठार यांच्या उपस्थितीत वीज वितरण कंपनीच्या वरिष्ठ अधिकाऱ्यांची आणि नागरिकांची विशेष बैठक आयोजित करण्यात आली आहे. ही बैठक शुक्रवार, दिनांक ५ जून २०२६ रोजी दुपारी १२ वाजता काझी शहाबुद्दीन हॉल, सावंतवाडी येथे होणार आहे. या महत्त्वपूर्ण बैठकीला महावितरणचे कुडाळ येथील वरिष्ठ अधिकारी श्री. वनमोरे, सावंतवाडी विभागातील सर्व अभियंते तसेच संबंधित सर्व अधिकारी उपस्थित राहणार आहेत.
नुकत्याच संपलेल्या मे महिन्यातील तीव्र उष्णतेच्या काळात शहरात वारंवार खंडित होणाऱ्या वीजपुरवठ्यामुळे सामान्य नागरिक, व्यापारी आणि व्यावसायिक मोठ्या प्रमाणात त्रस्त झाले आहेत. याबाबत स्थानिक पातळीवर अनेक तक्रारी करण्यात आल्या असल्या तरी, संबंधित वीज वितरण विभागाकडून त्याची अपेक्षित दखल घेतली गेली नसल्याची तीव्र भावना नागरिकांमध्ये निर्माण झाली आहे. या पार्श्वभूमीवर शहरातील वीजपुरवठा पुन्हा सुरळीत करण्यासाठी आणि नागरिकांच्या या गंभीर समस्या थेट जाणून घेऊन त्यावर तात्काळ तोडगा काढण्यासाठी आमदार प्रमोद जठार यांनी पुढाकार घेऊन या विशेष बैठकीचे आयोजन केले आहे.
शहरातील वीज समस्येचा हा प्रश्न अत्यंत गंभीर असल्याने या बैठकीस सावंतवाडी शहरातील सर्व नगरसेवक, लोकप्रतिनिधी, व्यापारी संघटना, विविध सामाजिक संस्थांचे पदाधिकारी तसेच सर्व नागरिकांनी मोठ्या संख्येने उपस्थित राहून आपल्या समस्या थेट अधिकाऱ्यांसमोर मांडाव्यात, असे जाहीर आवाहन भारतीय जनता पक्षाचे शहराध्यक्ष सुधीर आडिवरेकर, सावंतवाडी अर्बनचे सभापती आनंद नेवगी आणि माजी नगराध्यक्ष बबन साळगावकर यांनी संयुक्तपणे केले आहे.