वेंगुर्ला, दि .०१: जिद्द, मेहनत आणि सातत्यपूर्ण अभ्यासाच्या बळावर यशाचे शिखर गाठणाऱ्या विद्यार्थ्यांमध्ये आणखी एका गुणवंत विद्यार्थिनीची भर पडली आहे. वेंगुर्ला तालुक्यातील जि.प. प्राथमिक शाळा, होडवडे भोज नं. ३ येथील विद्यार्थिनी कु. स्वरा समीरचंद्र दळवी हिने सन २०२५-२६ मध्ये घेण्यात आलेल्या जवाहर नवोदय विद्यालय प्रवेश परीक्षेत उल्लेखनीय यश संपादन करत नवोदय विद्यालयात प्रवेशासाठी पात्रता मिळवली आहे. विशेष म्हणजे, तिने पूर्व उच्च प्राथमिक शिष्यवृत्ती परीक्षा (इयत्ता ५ वी) मध्ये तब्बल २१२ गुण मिळवत आपल्या गुणवत्तेची चमक पुन्हा एकदा सिद्ध केली आहे.
ग्रामीण भागातून शिक्षण घेत असतानाही स्वराने आपल्या मेहनतीच्या जोरावर हे यश संपादन केले आहे. तिच्या यशामागे तिची चिकाटी, नियमित अभ्यास आणि शिक्षकांचे योग्य मार्गदर्शन हे महत्त्वाचे घटक ठरले. विशेषतः तिला मार्गदर्शन करणाऱ्या शिक्षिका श्रीमती नंदिनी मधुकर भोसले यांच्या परिश्रमाचे सर्वत्र कौतुक होत आहे.
स्वराच्या या दैदिप्यमान यशाबद्दल वेंगुर्ला तालुक्याचे गटशिक्षणाधिकारी संतोष गोसावी, विस्तार अधिकारी रामचंद्र कोनकर तसेच होडवडे केंद्राचे केंद्रप्रमुख विठ्ठल तुळसकर यांनी तिचे आणि मार्गदर्शक शिक्षिका श्रीमती नंदिनी भोसले यांचे अभिनंदन करून पुढील शैक्षणिक वाटचालीस शुभेच्छा दिल्या. या यशामुळे शाळेच्या शिरपेचात मानाचा तुरा खोवला गेला असून शाळा व्यवस्थापन समिती, शिक्षकवृंद, पालक आणि ग्रामस्थांनी स्वरावर अभिनंदनाचा वर्षाव केला आहे. स्वराच्या या यशाने परिसरातील विद्यार्थ्यांसमोर प्रेरणेचा नवा आदर्श निर्माण केला आहे.