सावंतवाडी, दि.१२: भारतीय संस्कृतीचे जतन, सनातन धर्माचे रक्षण आणि हिंदू समाजात व्यापक ऐक्य निर्माण करण्याच्या उदात्त हेतूने सावंतवाडी शहरात येत्या रविवार, १७ मे २०२६ रोजी भव्य ‘सकल हिंदू संमेलना’चे आयोजन करण्यात आले आहे. शहरातील राणी पार्वती देवी हायस्कूलच्या सभागृहात सायंकाळी ४:०० वाजता हा ऐतिहासिक सोहळा संपन्न होणार असल्याची माहिती हिंदू संमेलन समन्वयक समितीचे संयोजक सुहास सातोस्कर यांनी आयोजित पत्रकार परिषदेत दिली.
या संमेलनासाठी प्रमुख अतिथी म्हणून वारकरी संप्रदायाचे सिंधुदुर्ग जिल्हाध्यक्ष ह.भ.प. विश्वनाथ गवंडळकर महाराज उपस्थित राहणार आहेत. तसेच, हिंदू संस्कृती आणि इतिहासाचे गाढे अभ्यासक डॉ. शिवरत्न शेटे (अध्यक्ष, हिंदवी परिवार), ज्ञान प्रबोधनीचे मुख्य समन्वयक अमित नाईक आणि युवा कीर्तनकार ह.भ.प. सायलीताई गावडे महाराज हे उपस्थितांना मार्गदर्शन करणार आहेत. पाचशे वर्षांच्या प्रदीर्घ संघर्षानंतर अयोध्येत साकारलेले भव्य राम मंदिर हे हिंदू अस्मितेचे प्रतीक ठरले आहे. मात्र, सध्या धर्म आणि संस्कृतीसमोर असलेल्या विविध आव्हानांचा समर्थपणे सामना करण्यासाठी सर्व भेदभाव विसरून संघटित होणे ही काळाची गरज आहे. याच ‘हिंदू एकता’ आणि ‘जागृती’चा संदेश जनमानसापर्यंत पोहोचवण्यासाठी या संमेलनाचे आयोजन करण्यात आले असल्याचे श्री. सातोस्कर यांनी यावेळी स्पष्ट केले.
या सोहळ्याचे नेटके नियोजन हिंदू संमेलन समन्वय समिती, सावंतवाडी यांच्या वतीने करण्यात आले आहे. यामध्ये संयोजक सुहास दत्तात्रय सातोस्कर, सहसंयोजक शांबा (अण्णा) म्हापसेकर, चंद्रशेखर पारधी, सौ. अपूर्वा माईणकर, सौ. अंजली नातू, चिन्मय रानडे आणि आनंद साधले यांचा मुख्य सहभाग आहे. “हिंदू सारा एक मंत्र हा दाही दिशांना घुमवूया” हा संकल्प घेऊन होणाऱ्या या कार्यक्रमाला सर्व माता, भगिनी आणि बांधवांनी आपल्या मित्रपरिवारासह पारंपारिक मंगल वेषात मोठ्या संख्येने उपस्थित राहावे, असे आवाहन समन्वय समितीच्या वतीने करण्यात आले आहे. या पत्रकार परिषदेला संयोजक सुहास सातोस्कर यांच्यासह अण्णा म्हापसेकर, अंजली नातू, किशोर नानिवडेकर, दिनेश गावडे, रोहन बांदेकर आदी मान्यवर उपस्थित होते.