सावंतवाडी,दि.२८ : शहर व परिसरात सुरू असलेल्या अवैध दारूविक्रीवर सावंतवाडी पोलिसांनी मंगळवारी सायंकाळपासून उशिरापर्यंत धडक कारवाई करत तिघांकडून मोठ्या प्रमाणात दारू जप्त केली. या कारवाईमुळे बेकायदेशीर धंदे करणाऱ्यांमध्ये खळबळ उडाली आहे.
पोलीस ठाणे हद्दीत २७ एप्रिल रोजी सायंकाळी ६ ते रात्री ११ या वेळेत ही संयुक्त मोहीम राबविण्यात आली.
सायंकाळी ७ वाजताच्या सुमारास कोलगाव येथील कुंभयाळवाडी परिसरात रवींद्र लक्ष्मण राऊळ (वय ४९) याच्या ताब्यातून सुमारे १०,१०० रुपये किमतीच्या १०० बेकायदेशीर दारूच्या बाटल्या जप्त करण्यात आल्या.
त्यानंतर रात्री पावणे आठ वाजता माझगाव ख्रिश्चनवाडी येथे लुईस अंतोन देसा (वय ६१) यांच्या ताब्यातून १,९०० रुपये किमतीच्या १९ बाटल्या जप्त करण्यात आल्या.
तिसऱ्या कारवाईत कलंबिस्त ख्रिश्चनवाडी येथील झूजे मोतेस रोड्रिक्स (वय ६७) याच्याकडून ४,१०० रुपये किमतीच्या विविध प्रकारच्या १८ बेकायदेशीर दारूच्या बाटल्या हस्तगत करण्यात आल्या.
या तिन्ही प्रकरणांत संबंधितांविरोधात गुन्हे दाखल करण्यात आले आहेत.
ही कारवाई स्थानिक गुन्हे शाखेचे पोलिस उपनिरीक्षक सुधीर सावंत, हवालदार प्रकाश कदम तसेच सावंतवाडी पोलीस ठाण्याच्या पोलिस उपनिरीक्षक श्रीमती मुळीक, हवालदार मनोज राऊत, अमित राऊळ, दीपक शिंदे आणि धोत्रे यांनी संयुक्तपणे केली.
दरम्यान, अवैध दारूविक्रीविरोधात अशी कारवाई पुढेही सुरू राहणार असल्याचा इशारा पोलिसांनी दिला आहे.
सावंतवाडीत अवैध दारूविक्रीवर पोलिसांची धडक कारवाई; तिघांवर गुन्हे दाखल
