बँकेच्या ७००० कोटींच्या विक्रमी व्यवसायाबद्दल अध्यक्ष, उपाध्यक्ष व संचालक मंडळाचे केले भरभरून कौतुक
सिंधूनगरी,दि.२४: माजी केंद्रीय मंत्री तथा राज्याचे माजी मुख्यमंत्री खासदार नारायण राणे यांनी आज सिंधुदुर्ग जिल्हा बँकेच्या ओरोस येथील प्रधान कार्यालयाला सदिच्छा भेट दिली. या भेटीदरम्यान त्यांनी बँकेच्या प्रगतीचा आढावा घेत जिल्हा बँकेच्या मजबूत आर्थिक स्थितीबद्दल समाधान व्यक्त केले. बँकेने नुकताच ७००० कोटी रुपयांच्या व्यवसायाचा टप्पा यशस्वीरित्या पार केल्याबद्दल त्यांनी बँकेचे अध्यक्ष मनीष दळवी, उपाध्यक्ष अतुल काळसेकर आणि संपूर्ण संचालक मंडळाचे विशेष अभिनंदन केले.
खासदार राणे यांचे बँकेत आगमन होताच अध्यक्ष मनीष दळवी व उपाध्यक्ष अतुल काळसेकर यांनी पुष्पगुच्छ आणि पुस्तक देऊन त्यांचे उत्साहात स्वागत केले. यावेळी खासदार राणे यांनी ३१ मार्च २०२६ रोजी संपलेल्या आर्थिक वर्षातील बँकेच्या स्थितीची सविस्तर माहिती घेतली. बँकेची आर्थिक घडी अत्यंत मजबूत असल्याचे सांगत त्यांनी व्यवस्थापनाच्या कामकाजावर विश्वास दर्शवला. विशेषतः आयबीपीएस (IBPS) कंपनीमार्फत राबवण्यात आलेली भरती प्रक्रिया पारदर्शकपणे पार पाडल्याबद्दल त्यांनी बँकेच्या नेतृत्वाचे कौतुक केले.
याप्रसंगी बँकेचे संचालक गजानन गावडे, समीर सावंत, विद्याप्रसाद बांदेकर, प्रकाश बोडस, जिल्हा परिषद माजी अध्यक्ष प्रमोद कामत, मिलिंद कुलकर्णी, संदीप कुडतरकर, बँकेचे प्रभारी मुख्य कार्यकारी अधिकारी दिवाकर देसाई यांच्यासह बँकेचे विविध अधिकारी व पदाधिकारी उपस्थित होते. “जिल्हा बँकेच्या उत्कर्षासाठी आपले नेहमीच सहकार्य आणि आशीर्वाद राहतील,” असे आश्वासनही खासदार नारायण राणे यांनी यावेळी दिले. त्यांच्या या भेटीमुळे बँकेच्या कामकाजाला नवी उभारी मिळाली असून कर्मचारी वर्गात आनंदाचे वातावरण आहे.