आरवलीत उत्साहाचे वातावरण
सपत्नीक दर्शन घेऊन व्यक्त केली सुख-शांतीची भावना; भाविकांशी साधला संवाद
वेंगुर्ला,दि.२३: कोकणचे जागृत देवस्थान आणि हजारो भाविकांचे श्रद्धास्थान असलेल्या आरवली येथील श्री देव वेतोबाच्या चरणी भाजप युवा नेते विशालजी परब यांनी सपत्नीक नतमस्तक होऊन दर्शन घेतले. यात्रेच्या निमित्ताने आयोजित या भेटीत त्यांनी श्री देव वेतोबाकडे कोकणातील जनतेच्या सुख, शांती आणि समृद्धीसाठी साकडे घातले. त्यांच्या या भेटीमुळे मंदिर परिसरात कार्यकर्त्यांमध्ये आणि स्थानिक ग्रामस्थांमध्ये मोठा उत्साह पाहायला मिळाला.
यात्रेच्या औचित्याने आरवली नगरीत भाविकांची मोठी मांदियाळी जमली होती. विशालजी परब यांनी पत्नी सौ. वेदिका परब यांच्यासह विधीवत दर्शन घेतल्यानंतर मंदिर परिसरात उपस्थित असलेल्या स्थानिक नागरिकांशी आणि भाविकांशी आपुलकीने संवाद साधला. यावेळी बोलताना त्यांनी, कोकणातील प्रत्येक नागरिक सुखी, समाधानी आणि आनंदी राहावा, तसेच समाजात सदैव ऐक्य, शांतता आणि प्रगती नांदावी, अशी मनोकामना व्यक्त केली. वेतोबाच्या आशीर्वादाने कोकणची प्रगती व्हावी, हीच आपली भावना असल्याचे त्यांनी यावेळी नमूद केले.
आरवलीमध्ये आगमन होताच स्थानिक पदाधिकारी आणि ग्रामस्थांच्या वतीने विशालजी परब यांचे जंगी स्वागत करण्यात आले. याप्रसंगी आरवलीचे सरपंच समीर कांबळी, सागर तीर्थचे सरपंच एकनाथ कुडव, शिरोड्याचे माजी सरपंच मनोज उगवेकर, आरवलीचे माजी सरपंच तातोबा कुडव, मंदिर कमिटीचे सदस्य प्रसाद साळगावकर, किरण पालयेकर, मिलिंद साळगावकर आणि मयूर आरोलकर यांसह विविध क्षेत्रातील मान्यवर मोठ्या संख्येने उपस्थित होते. राजकीय आणि सामाजिक क्षेत्रातील या मान्यवरांच्या उपस्थितीमुळे संपूर्ण आरवली नगरी भक्तीमय आणि उत्साही वातावरणात न्हाऊन निघाली होती.