सावंतवाडी,दि.२३: जिल्हा परिषद निवडणूक २०२६ मध्ये माजगाव मतदार संघातून विक्रमी मताधिक्याने विजयी होऊन सिंधुदुर्ग जिल्हा परिषदेच्या शिक्षण व क्रीडा समिती सदस्यपदी निवड झाल्याबद्दल, श्री. विक्रांत विकास सावंत यांचा शिक्षण प्रसारक मंडळ, सावंतवाडी या संस्थेच्या वतीने विशेष अभिष्टनंदन सोहळा आयोजित करण्यात आला आहे. संस्थेचे अध्यक्ष म्हणून कार्यरत असलेल्या श्री. सावंत यांच्या या यशाचा गौरव करण्यासाठी आज, गुरुवारी या कार्यक्रमाचे आयोजन करण्यात आले आहे.
हा समारंभ आज, दिनांक २३ एप्रिल २०२६ रोजी सकाळी १०.०० वाजता सावंतवाडी येथील राणी पार्वतीदेवी हायस्कूल व ज्युनिअर कॉलेजच्या आवारात संपन्न होणार आहे. माजगाव मतदारसंघातून त्यांनी मिळविलेले अभूतपूर्व यश आणि त्यानंतर जिल्हा परिषदेच्या महत्त्वपूर्ण समितीवर झालेली त्यांची निवड, ही तालुक्याच्या शैक्षणिक व क्रीडा क्षेत्रासाठी अभिमानास्पद बाब मानली जात आहे. याच भावनेतून संस्थेच्या वतीने त्यांच्या सन्मानाचे आयोजन करण्यात आले आहे.
या कार्यक्रमास शिक्षण प्रसारक मंडळाचे सर्व सन्माननीय पदाधिकारी, सदस्य, शिक्षक, शिक्षकेतर कर्मचारी तसेच विद्यार्थी व पालक मोठ्या संख्येने उपस्थित राहणार आहेत. आपल्या संस्थेच्या अध्यक्षांचा हा गौरव सोहळा यशस्वी करण्यासाठी आणि समारंभाची शोभा वाढवण्यासाठी सर्व मान्यवरांनी वेळेवर उपस्थित राहावे, असे आवाहन शिक्षण प्रसारक मंडळाच्या वतीने करण्यात आले आहे.
