अक्षय तृतीयेच्या मुहूर्तावर बिरोडकर टेंब परिसरात अत्याधुनिक सौंदर्य सेवांचे दालन खुले
सावंतवाडी,दि.२०: सावंतवाडीतील द्वारकानगरी, बिरोडकर टेंब येथे अक्षय तृतीयेच्या शुभ मुहूर्तावर “सारीका ब्युटी पार्लर”चा शानदार उद्घाटन सोहळा रविवारी संध्याकाळी अत्यंत उत्साही वातावरणात संपन्न झाला. सकल मराठा समाजाचे जिल्हाध्यक्ष तथा कोकण लाईव्ह ब्रेकिंग न्यूज चॅनेलचे संपादक सीताराम गावडे आणि सौ. संयुक्ता गावडे यांच्या हस्ते या पार्लरचे अधिकृत उद्घाटन करण्यात आले. या नवीन उपक्रमामुळे परिसरातील महिला वर्गामध्ये आनंदाचे वातावरण निर्माण झाले आहे.
या कार्यक्रमाला माजी नगरसेविका साक्षी कुडतरकर, संतोष ठोंबरे, मनीषा गावडे, सायली राणे, सौ. संपदा परब यांसह वाड्यातील महिला भगिनी मोठ्या संख्येने उपस्थित होत्या. उद्घाटन प्रसंगी बोलताना सीताराम गावडे यांनी पार्लरच्या पुढील वाटचालीस शुभेच्छा दिल्या. महिलांसाठी अशा प्रकारच्या अद्ययावत सुविधा शहराच्या एका विशिष्ट प्रभागात उपलब्ध होणे ही काळाची गरज असल्याचे मत यावेळी मान्यवरांनी व्यक्त केले.
नूतन सुरू करण्यात आलेल्या “सारीका ब्युटी पार्लर”मध्ये महिलांसाठी एकाच छताखाली विविध अत्याधुनिक व दर्जेदार सौंदर्य सेवा उपलब्ध करून देण्यात येणार आहेत. यामध्ये प्रामुख्याने फेशियल व स्किन ट्रीटमेंट, ब्रायडल मेकअप व पार्टी मेकअप, हेअर कटिंग, हेअर स्पा व हेअर स्टायलिंग, आयब्रो, थ्रेडिंग व वॅक्सिंग, मेहंदी डिझाईन, नेल आर्ट आणि मॅनिक्युअर-पेडिक्युअर अशा विविध सेवांचा समावेश आहे. आधुनिक तंत्रज्ञानाचा वापर आणि अनुभवी स्टाफच्या माध्यमातून ग्राहकांना उत्कृष्ट सेवा देण्याचा मानस पार्लरच्या वतीने व्यक्त करण्यात आला आहे.
या नव्या उपक्रमामुळे स्थानिक महिलांना आता सौंदर्य सेवांसाठी बाजारपेठेत जाण्याची धावपळ करावी लागणार नाही. स्थानिक स्तरावरच सर्व सोयी उपलब्ध झाल्याने परिसरातून समाधान व्यक्त होत असून, उद्घाटन सोहळ्याच्या निमित्ताने द्वारकानगरी परिसरात मोठी गर्दी आणि उत्साहाचे वातावरण पाहायला मिळाले.