सावंतवाडी,दि.१७: सावंतवाडी येथील पोलीस स्टेशन समोर श्री औदुंबर स्वामी उत्सव समिती आणि पोलीस बॉईज मित्र मंडळ यांच्या संयुक्त विद्यमाने स्वामी समर्थांचे नूतन मंदिर उभारण्यात आले आहे. या मंदिराचा भव्य प्राणप्रतिष्ठापना सोहळा रविवार, १९ एप्रिल २०२६ रोजी अक्षय तृतीयेच्या शुभमुहूर्तावर अत्यंत उत्साहात साजरा होणार आहे. या मंगलमयी दिनाचे औचित्य साधून दिवसभर विविध धार्मिक आणि सांस्कृतिक कार्यक्रमांची रेलचेल असणार आहे.
सोहळ्याच्या मुख्य विधींना दुपारी १२ वाजून २६ मिनिटांनी सुरुवात होईल. यामध्ये गणपती पूजन, पुण्याहवाचन, प्राकार शुद्धी, पितृदेवता पूजन, अग्निस्थापन, ग्रहवास्तू हवन, मुख्यदेवता हवन आणि पूर्णाहुती असे शास्त्रोक्त विधी पार पडणार आहेत. धार्मिक विधींनंतर दुपारी १२:३० ते १ या वेळेत भव्य महाआरती संपन्न होईल. त्यानंतर दुपारी १ ते ३ या वेळेत भाविकांसाठी महाप्रसाद आणि तीर्थप्रसादाचे आयोजन करण्यात आले आहे. सायंकाळी ६ वाजल्यापासून सुश्राव्य भजनाच्या कार्यक्रमाने या सोहळ्याची सांगता होणार आहे.
हा संपूर्ण सोहळा श्री औदुंबर स्वामी मंदिर आणि पोलीस बॉईज मित्र मंडळ, सावंतवाडी यांच्या वतीने आयोजित करण्यात आला असून, सर्व भाविकांनी मोठ्या संख्येने उपस्थित राहून दर्शनाचा व महाप्रसादाचा लाभ घ्यावा, असे आवाहन पोलीस निरीक्षक अमोल चव्हाण यांनी केले आहे. दरम्यान, ज्या भाविकांना या नूतन मंदिरासाठी किंवा उत्सवासाठी स्वइच्छेने मदत करायची आहे, त्यांनी अमोल टेंबकर (९९२२३१६७७७) यांच्याशी संपर्क साधावा, असे आवाहन उत्सव समितीच्या वतीने करण्यात आले आहे.
