वेंगुर्ला,दि.१७: सिंधुदुर्ग जिल्ह्यातील प्रसिद्ध धार्मिक स्थळ असलेल्या श्री क्षेत्र रेडी येथील श्री गजानन देवस्थान, नागोळेवाडी येथे रेडी गणपतीचा ५० वा वाढदिवस सोहळा शनिवार, दिनांक १८ एप्रिल २०२६ रोजी मोठ्या उत्साहात साजरा होणार आहे. या सुवर्ण महोत्सवी वर्षानिमित्त देवस्थानच्या वतीने दिवसभर विविध धार्मिक विधी आणि सांस्कृतिक कार्यक्रमांची जय्यत तयारी करण्यात आली आहे.
शनिवारी सकाळी ६:०० वाजता अभिषेक करून उत्सवाला सुरुवात होईल. त्यानंतर सकाळी ८:०० वाजता श्री सत्यविनायक महापूजेचे आयोजन करण्यात आले आहे. दुपारी १२:३० वाजता महाआरती होऊन १२:४५ वाजता तीर्थप्रसादाचे वाटप केले जाईल. दुपारी १:०० ते ५:०० या वेळेत सर्व भाविकांसाठी महाप्रसादाचे (भंडारा) आयोजन करण्यात आले आहे.
संध्याकाळच्या सत्रात भक्ती आणि कलेचा संगम पाहायला मिळणार आहे. दुपारी ३:०० ते रात्री ८:०० या वेळेत स्थानिक भजनी मंडळांची भजने सादर होतील. सायंकाळी ५:०० वाजता ‘श्री गणेश माऊली संगीत ग्रुप’ प्रस्तुत ‘स्वर गणेश’ हा बहारदार संगीताचा कार्यक्रम होईल. रात्री ८:३० वाजता या सोहळ्याची सांगता नाईक मोचेमाडकर दशावतार नाट्य मंडळाच्या पौराणिक दशावतारी नाटकाने होणार आहे.
या मंगलमयी सोहळ्याला सर्व भाविकांनी सहकुटुंब, सहपरिवार उपस्थित राहून दर्शनाचा आणि महाप्रसादाचा लाभ घ्यावा, असे आवाहन श्री देव गजानन देवस्थान ट्रस्ट, रेडी व नागोळेवाडी ग्रामस्थांच्या वतीने करण्यात आले आहे. कार्यक्रमाच्या नियोजनासाठी कृष्णाजी श्रीनिवास कामत,विनायक सदानंद कांबळी, संदेश सदानंद कांबळी आणि समस्त देवस्थान समिती विशेष परिश्रम घेत आहेत.
