सावंतवाडी,दि.१७: मराठी भाषेचा प्रचार आणि प्रसार करण्याच्या उद्देशाने आयोजित करण्यात आलेल्या राज्यस्तरीय ‘विश्वकोश ज्ञानवर्धन’ स्पर्धा परीक्षेत कलंबिस्त हायस्कूलच्या विद्यार्थ्यांनी घवघवीत यश संपादन केले आहे. या परीक्षेत विद्यालयाचा विद्यार्थी पारस देविदास दळवी याने सावंतवाडी तालुक्यात ग्रामीण स्तरावर प्रथम क्रमांक पटकावून शाळेच्या शिरपेचात मानाचा तुरा रोवला आहे, तर कु. ऋतुजा संतोष सावंत हिने द्वितीय क्रमांक प्राप्त करत आपल्या यशाची मोहोर उमटवली आहे.
महाराष्ट्र शासनाचा मराठी भाषा विभाग आणि मराठी विश्वकोश निर्मिती मंडळ यांच्या संयुक्त विद्यमाने इयत्ता नववीतील विद्यार्थ्यांसाठी या विशेष परीक्षेचे आयोजन करण्यात आले होते. विद्यार्थ्यांमध्ये वाचनाची गोडी निर्माण व्हावी आणि मराठी भाषेतील ज्ञानकोशांची ओळख व्हावी, हा या स्पर्धेमागचा मुख्य हेतू होता. या स्पर्धेत कलंबिस्त हायस्कूलच्या दोन्ही विद्यार्थ्यांनी अत्यंत चुरशीच्या वातावरणात आपली बुद्धिमत्ता सिद्ध केली.
या यशाबद्दल कलंबिस्त हायस्कूलचे संस्थाध्यक्ष शिवाजी सावंत, सचिव यशवंत राऊळ, सहसचिव चंद्रकांत राणे आणि मुख्याध्यापक अभिजीत जाधव यांनी दोन्ही गुणवंत विद्यार्थ्यांचे विशेष कौतुक केले आहे. या परीक्षेत सहभागी होण्यासाठी आणि उत्तम तयारी करण्यासाठी विद्यार्थ्यांना प्रशालेचे सहाय्यक शिक्षक किशोर वालावलकर यांचे बहुमोल मार्गदर्शन लाभले. तालुक्यातील ग्रामीण विभागात शाळेने मिळवलेल्या या यशाबद्दल संस्था पदाधिकारी, शिक्षक, शिक्षकेतर कर्मचारी आणि पालकांकडून विद्यार्थ्यांवर अभिनंदनाचा वर्षाव होत आहे.
