अध्यक्षपदी प्रतीक राणे, तर सचिवपदी प्रथमेश गवस यांची निवड; पत्रकारांच्या हितासाठी एकजुटीचा निर्धार
दोडामार्ग,दि.१०: अखिल भारतीय डिजिटल मीडिया संपादक पत्रकार संघटनेच्या सिंधुदुर्ग जिल्ह्यातील दोडामार्ग तालुका कार्यकारिणीची घोषणा नुकतीच दिमाखात करण्यात आली आहे. संघटनेचे राष्ट्रीय अध्यक्ष राजा माने यांच्या मार्गदर्शनाखाली आणि राज्य उपाध्यक्ष ज्येष्ठ संपादक सागर चव्हाण, राज्य संघटक सिताराम गावडे, कोकण प्रदेशाध्यक्ष प्रा. रुपेश पाटील, कोकण संघटक राजेश नाईक तसेच जिल्हाध्यक्ष भरत केसरकर व जिल्हा संघटक आनंद धोंड यांच्या विशेष समन्वयातून ही नवी टिम जाहीर करण्यात आली आहे. या नव्या कार्यकारिणीमध्ये तरुण आणि अभ्यासू पत्रकार प्रतीक राणे यांची तालुकाध्यक्ष म्हणून निवड करण्यात आली असून, सचिवपदाची महत्त्वाची धुरा प्रथमेश गवस यांच्याकडे सोपविण्यात आली आहे.
या निवडीमध्ये संघटनेच्या बळकटीकरणासाठी विविध पदांवर नियुक्ती करण्यात आली असून शुभम गवस यांची संघटकपदी, तर गोविंद शिरसाट यांची खजिनदार म्हणून निवड झाली आहे. तसेच ज्येष्ठ पत्रकार प्रमोद गवस आणि रामचंद्र सावंत यांची सदस्य म्हणून, तर शिरीष नाईक यांची जिल्हा कार्यकारिणी सदस्य म्हणून नियुक्ती करण्यात आली आहे. ही नूतन कार्यकारिणी आगामी काळात डिजिटल माध्यम क्षेत्रातील पत्रकारांचे प्रश्न प्रभावीपणे मांडणार असून, संघटन अधिक मजबूत करण्यासाठी आणि पत्रकारांच्या हिताचे विविध उपक्रम राबविण्यासाठी कटिबद्ध असल्याचा संकल्प यावेळी व्यक्त करण्यात आला आहे.
दरम्यान, या नूतन पदाधिकाऱ्यांचे संघटनेचे राष्ट्रीय अध्यक्ष राजा माने, राज्य सचिव तेजस राऊत यांच्यासह जिल्ह्यातील सर्व वरिष्ठ पदाधिकाऱ्यांनी अभिनंदन केले आहे. नव्या दमाच्या या टीममुळे दोडामार्ग तालुक्यातील डिजिटल पत्रकारांना हक्काचे व्यासपीठ मिळणार असून, त्यांच्या पुढील यशस्वी वाटचालीस सर्व स्तरातून शुभेच्छांचा वर्षाव करण्यात येत आहे.