वेंगुर्ले, दि.०८: तालुक्यातील दाभोली कोऱ्याचीवाडी परिसरात आज एक अत्यंत धक्कादायक आणि थरकाप उडवणारी घटना समोर आली आहे. येथील स्थानिक रहिवासी विवेक जोशी यांच्या घराच्या थेट स्वयंपाकघरात एका बिबट्याने शिरकाव केल्याने संपूर्ण परिसरात भीतीचे वातावरण पसरले आहे. मिळालेल्या माहितीनुसार, विवेक जोशी यांच्या हे लक्षात येताच त्यांनी प्रसंगावधान राखून तातडीने घराचे दरवाजे बाहेरून बंद केले आणि स्वतःचा जीव वाचवला. घराच्या बंद खोलीत बिबट्या अडकल्याची खात्री पटताच जोशी यांनी तातडीने याची माहिती वनविभागाला दिली. घटनेचे गांभीर्य ओळखून वनविभागाचे अधिकारी आणि कर्मचारी तातडीने घटनास्थळी दाखल झाले आहेत. सध्या या बिबट्याला सुरक्षितपणे जेरबंद करण्यासाठी वनविभागाकडून शर्थीचे प्रयत्न सुरू असून, घराभोवती बघ्यांची मोठी गर्दी जमली आहे. भरवस्तीत आणि घरात बिबट्या शिरल्याच्या या घटनेमुळे ग्रामस्थांमध्ये भीतीचे वातावरण निर्माण झाले आहे.
