कणकवलीत रंगणार शानदार सोहळा; गायक सोनू निगम यांचा लाईव्ह कार्यक्रम
सिंधुदुर्ग,दि.०७: कोकणाचे भाग्यविधाते, माजी मुख्यमंत्री तथा भाजप खासदार नारायण राणे यांचा १० एप्रिल २०२६ रोजी ७४ वा वाढदिवस असून या निमित्ताने ते आपल्या अमृत महोत्सवी वर्षात पदार्पण करत आहेत. हा ऐतिहासिक टप्पा यादगार करण्यासाठी जिल्हावासियांच्या वतीने ‘अमृत महोत्सवी वर्ष स्वागत समिती’ स्थापन करण्यात आली असून, ७४ व्या वाढदिवसापासून ते ७५ व्या वाढदिवसापर्यंत वर्षभर विविध लोकोपयोगी उपक्रम राबविण्याचे नियोजन करण्यात आले आहे. या महोत्सवी वर्षाचा शुभारंभ १० एप्रिल रोजी सायंकाळी जिल्हा उप रुग्णालय कणकवली समोरील पटांगणावर राज्यातील अनेक मान्यवर नेत्यांच्या उपस्थितीत मोठ्या थाटामाटात संपन्न होणार आहे. या मुख्य सोहळ्यानंतर लगेचच प्रसिद्ध गायक सोनू निगम यांच्या ‘लाईव्ह’ गायनाचा कार्यक्रम आयोजित करण्यात आला असून ही जिल्हावासियांसाठी मोठी सांगीतिक मेजवानी ठरणार आहे.
खासदार नारायण राणे यांना शुभेच्छा देताना यावर्षी पुष्पगुच्छ न स्वीकारता पुस्तक स्वरूपात भेट स्वीकारण्याचा एक स्तुत्य आणि अभिनव उपक्रम स्वागत समितीने हाती घेतला आहे. याद्वारे संकलित झालेली पुस्तके जिल्ह्यातील विविध ग्रंथालयांना वितरित केली जाणार असून, त्यामाध्यमातून जिल्ह्यात वाचक चळवळ अधिक वृद्धिंगत होण्यास मदत होणार आहे. ज्या नेत्याने आपले संपूर्ण आयुष्य कोकणवासीयांच्या हितासाठी आणि विकासासाठी समर्पित केले, त्या समर्पणाचा यथोचित गौरव करण्याची संधी या निमित्ताने समस्त जिल्हावासियांना प्राप्त झाली आहे. १० एप्रिल २०२६ पासून पुढील वर्षभर म्हणजेच १० एप्रिल २०२७ पर्यंत सामाजिक बांधिलकी जपणारे विविध कार्यक्रम समितीच्या वतीने राबवले जाणार आहेत. तरी या सोहळ्याला जिल्ह्यातील राजकीय व सामाजिक क्षेत्रातील कार्यकर्ते, हितचिंतक आणि सर्व नागरिकांनी मोठ्या संख्येने उपस्थित राहावे, असे आवाहन अमृत महोत्सवी वर्ष स्वागत समितीच्या वतीने करण्यात आले आहे.