यंत्र आणि तंत्रापेक्षा जिद्दीच्या जोरावर उभे राहिलेले जागृत देवस्थान; पावसाळ्यापूर्वी दुरुस्ती करण्याचे मोठे आव्हान
सावंतवाडी,दि.३१: तंत्रज्ञानाच्या युगात जग वेगाने पुढे जात असले, तरी सावंतवाडी तालुक्यापासून अवघ्या ३ किमी अंतरावर असलेल्या कोलगाव-झिरंगवाडी (सुकेतळे) येथे आजही केवळ ‘श्रमशक्ती’ आणि ‘अढळ श्रद्धा’ यांच्या जोरावर एक जागृत देवस्थान भक्तांचे श्रद्धास्थान बनून उभे आहे. निसर्गाच्या कुशीत एका विशाल शिळेवर नैसर्गिकरित्या उमटलेली मारुतीरायाची प्रतिकृती आणि तिथे पोहोचण्यासाठी करावा लागणारा ३ किमीचा खडतर डोंगरप्रवास, हे खऱ्या अर्थाने भक्तीचे एक अनोखे दर्शन घडवते. या मंदिराचे सर्वात मोठे वैशिष्ट्य म्हणजे येथे पोहोचण्यासाठी आजही साधा कच्चा रस्ता उपलब्ध नाही. कोणतेही वाहन पोहोचू शकणार नाही अशा वेड्यावाकड्या वळणांच्या, घनदाट जंगलाच्या आणि तीव्र चढणीच्या वाटेने डोंगर चढून भाविकांना जावे लागते. सुमारे १५-२० वर्षांपूर्वी जेव्हा हे मंदिर उभारले गेले, तेव्हा सिमेंटच्या गोण्यांपासून ते पत्र्यांपर्यंत सर्व जड साहित्य ग्रामस्थांनी चक्क आपल्या पाठीवर आणि डोक्यावरून ३ किमी डोंगर चढून नेले होते. विशेष म्हणजे आजही येथे कोणतीही औपचारिक कमिटी किंवा अध्यक्ष नाही, तर केवळ ‘ग्रामस्थांची एकजूट’ हेच या मंदिराचे खरे वैभव आहे.
डोंगराळ भागामुळे या ठिकाणी अद्याप विजेची सोय झालेली नाही, तरीही ग्रामस्थांच्या उत्साहात कोणतीही कमतरता भासत नाही. हनुमान जयंतीला जेव्हा हजारो भाविक दर्शनासाठी येतात, तेव्हा महाप्रसादाचे नियोजन करणे हे ग्रामस्थांसमोर एक मोठे आव्हान असते. विहीर डोंगराच्या खालच्या बाजूला असल्याने आणि पाणी खेचण्यासाठी कोणतेही मशीन किंवा पंप नसल्याने, स्थानिक ग्रामस्थ आजही २०० ते ३०० पाण्याच्या कळश्या डोक्यावर वाहून उंचावर नेतात आणि पाण्याचा साठा करतात. इतकेच नाही तर, तिथे गॅस किंवा इतर इंधनाची सोय नसल्याने डोंगरदऱ्यातून वाळलेली लाकडे गोळा करून चुलीवरच हजारो भाविकांचा महाप्रसाद शिजवला जातो. आपले वैयक्तिक उद्योग-व्यवसाय बाजूला सारून ही ग्रामस्थ मंडळी जी सेवा करतात, ती आजच्या काळात अत्यंत दुर्मिळ मानली जात आहे.
मात्र, अनेक वर्षे निसर्गाचा मारा सोसल्यामुळे आता या मंदिराच्या पत्र्यांची शेड पूर्णपणे गंजली असून ठिकठिकाणी पडझड सुरू झाली आहे. पावसाळ्यात येथे दर्शनासाठी येणाऱ्या भाविकांना यामुळे मोठी अडचण निर्माण होत आहे. या जागृत देवस्थानाचे जतन होणे आणि मंदिराची तातडीने डागडुजी होणे आता काळाची गरज बनली आहे. सर्व साहित्य डोक्यावर वाहून नेण्याची जिद्द आजही ग्रामस्थांकडे कायम आहे, आता गरज आहे ती फक्त समाजातील दातृत्वाच्या हातांची. कोलगाव-झिरंगवाडी येथील या जागृत मारुती मंदिराच्या दुरुस्तीसाठी पत्रे, सिमेंट, बांधकाम साहित्य किंवा आर्थिक स्वरूपात मदत करण्याचे आवाहन स्थानिक ग्रामस्थांकडून करण्यात आले आहे.
ज्या भक्तांना या सत्कार्यात खारीचा वाटा उचलण्याची इच्छा आहे, त्यांनी प्रविण सावंत (94058 33955), विशाल पित्रे (9405475712), शामप्रसाद पित्रे (9421148556), हेमंत कासार (7219156234), तुषार कासार (94229 79391), तुकाराम कासार (94227 67793), महेश सावंत (88064 65621), गौरव कासार (96232 65082) किंवा गौरव कुडाळकर (86980 71910) यांच्याशी संपर्क साधून सढळ हस्ते मदत करावी, जेणेकरून या भक्तीच्या केंद्राला पुन्हा पूर्वीची झळाळी मिळेल.