सावंतवाडी,दि.२६: शिरशिंगे परबवाडी येथील ग्रामस्थांची रस्ते विकासाची अनेक वर्षांची प्रतीक्षा आता संपली आहे. गावातील मुख्य रस्ता ते विश्वनाथ परब यांच्या घरापर्यंत जाणाऱ्या रस्त्याच्या कामाचे भूमिपूजन शिवसेना (शिंदे गट) सावंतवाडी उपतालुकाप्रमुख जीवन लाड यांच्या हस्ते मोठ्या उत्साहात करण्यात आले. या नवीन रस्त्यामुळे परबावाडीतील रहिवाशांचा दळणवळणाचा प्रश्न सुटणार असून स्थानिक विकासाला गती मिळणार आहे.
भूमिपूजन प्रसंगी बोलताना जीवन लाड यांनी सांगितले की, सर्वसामान्यांचे प्रश्न सोडवणे आणि दुर्गम भागातील वाड्या-वस्त्यांवर पायाभूत सुविधा पोहोचवणे हेच आमचे मुख्य ध्येय आहे. ग्रामस्थांनी केलेल्या मागणीची दखल घेत या कामाचा पाठपुरावा करण्यात आला असून, आगामी काळातही मतदारसंघातील प्रलंबित विकासकामे प्राधान्याने मार्गी लावली जातील, अशी ग्वाही त्यांनी यावेळी दिली.
या कार्यक्रमाला शिवसेना कार्यकर्ते अंकुश परब, सामाजिक कार्यकर्ते भालचंद्र परब यांच्यासह शिरशिंगे आणि परबावाडी गावातील ग्रामस्थ मोठ्या संख्येने उपस्थित होते.
रस्त्याच्या कामाचे भूमिपूजन झाल्याने ग्रामस्थांनी आनंद व्यक्त केला असून, स्थानिक लोकप्रतिनिधी आणि शिवसेना पदाधिकाऱ्यांचे आभार मानले आहेत. अनेक वर्षांपासून प्रलंबित असलेला हा रस्ता पूर्ण झाल्यावर पावसाळ्यातील कसरत थांबणार असल्याने महिला व वृद्धांनी समाधान व्यक्त केले आहे.