वेंगुर्ला,दि.२४: निसर्गाच्या किमयेचे अनेक नमुने आपल्याला पाहायला मिळतात, मात्र सिंधुदुर्ग जिल्ह्यातील वेंगुर्ला तालुक्यात एक असाच थक्क करणारा प्रकार समोर आला आहे. दाभोली येथील प्रगतशील शेतकरी श्रीपाद ओगले यांच्या बागेत सुपारीच्या एका झाडाला चक्क १० पेक्षा जास्त फांद्या फुटल्या असून, हा विषय सध्या संपूर्ण जिल्ह्यात चर्चेचा ठरत आहे.
साधारणपणे सुपारीचे झाड हे सरळ उंच वाढणारे झाड म्हणून ओळखले जाते, ज्याला वरच्या बाजूला एकच शेंडा किंवा मुख्य फांदी असते. मात्र, ओगले यांच्या बागेतील हे झाड याला अपवाद ठरले आहे. एकाच झाडाला दहाहून अधिक फांद्या फुटल्याने हे भारतातील अशा प्रकारचे एकमेव झाड असावे, असा अंदाज वर्तवण्यात येत आहे.
श्रीपाद ओगले यांच्या बागेत सुमारे एक हजार सुपारीची झाडे आहेत, परंतु इतर सर्व झाडे नेहमीप्रमाणे वाढत असताना केवळ याच एका झाडावर निसर्गाचा हा आगळावेगळा चमत्कार पाहायला मिळत आहे. या झाडाची माहिती परिसरात वाऱ्यासारखी पसरली असून, निसर्गाचे हे विलोभनीय रूप पाहण्यासाठी अनेकांची पावले आता दाभोलीकडे वळू लागली आहेत.
