सावंतवाडी,दि.२४ : सावंतवाडीत शेअर ट्रेडिंग मार्केटमधील कोट्यवधींच्या घोटाळ्याने आता एक मोठे आणि गंभीर वळण घेतले आहे. या प्रकरणातील मुख्य संशयित आरोपी सागर कारिवडेकर याच्या सावंतवाडीतील आलिशान बंगल्यावर आज सकाळी ठाणे क्राईम ब्रँचच्या विशेष पथकाने धाड टाकली. गुंतवणूकदारांना अवाढव्य नफ्याचे आमिष दाखवून कोट्यवधी रुपयांची फसवणूक केल्याचा आरोप या प्रकरणात करण्यात आला असून, आज पोलीस पथकाने या बंगल्याचा पंचनामा सुरू केल्याने संपूर्ण सिंधुदुर्ग जिल्ह्यात मोठी खळबळ उडाली आहे.
या घोटाळ्याचे धागेदोरे ठाण्यापासून सावंतवाडीपर्यंत पसरले असल्याचे तपासात उघड झाले आहे. ठाण्यातील सचिन राणे, प्रिती राणे आणि सावंतवाडीचा सागर कारिवडेकर या तिघांनी मिळून हे मोठे रॅकेट चालवल्याचा संशय व्यक्त केला जात आहे. या तिघांनाही या महाघोटाळ्याचे मुख्य सूत्रधार मानले जात असून, त्यांच्यातील ‘ठाणे ते सावंतवाडी’ कनेक्शन समोर आल्याने आता तपासाची चक्रे वेगाने फिरू लागली आहेत. विशेष म्हणजे, सागर कारिवडेकर याने सावंतवाडीत जर्मन तंत्रज्ञानाचा वापर करून एक अत्यंत आलिशान बंगला उभारला होता, जो सध्या पोलीस तपासाच्या केंद्रस्थानी आहे.
घोटाळा उघडकीस आल्यानंतर सागर कारिवडेकर सध्या फरार असल्याचे समजते, पोलीस त्याचा कसून शोध घेत आहेत. आज त्याच्या निवासस्थानी नातेवाईकांच्या उपस्थितीत पंचनामा करण्यात येत असून, मालमत्तेची कागदपत्रे आणि इतर महत्त्वाचे पुरावे गोळा करण्याचे काम क्राईम ब्रँचकडून केले जात आहे. कालच ठाण्यातील संतप्त गुंतवणूकदारांनी पोलीस ठाण्यावर धडक देत कारवाईची जोरदार मागणी केली होती, त्यानंतर अवघ्या काही तासांतच ही मोठी कारवाई करण्यात आली आहे. या प्रकरणात आणखी काही मोठ्या नावांचा समावेश असण्याची शक्यता वर्तवण्यात येत असून, पोलीस प्रशासन आता या प्रकरणाच्या मुळाशी जाण्याचा प्रयत्न करत आहे.
