रेडी येथे धर्मवीर छत्रपती श्री संभाजी महाराज बलिदान मासनिमित्त आयोजित रक्तदान व आरोग्य शिबिरास नागरिकांचा उत्स्फूर्त प्रतिसाद

वेंगुर्ला,दि.१७: धर्मवीर छत्रपती श्री संभाजी महाराज बलिदान मास स्मृती प्रित्यर्थ रेडी येथे आयोजित करण्यात आलेल्या रक्तदान शिबीर, नेत्र तपासणी व चष्मा वाटप शिबिरास नागरिकांनी उत्स्फूर्त प्रतिसाद दिला आहे. या विशेष आरोग्य उपक्रमाची सुरुवात श्री. जयवंत मुळीक व चेतन सावंत यांनी धर्मवीर छत्रपती श्री संभाजी महाराजांच्या मूर्तीचे पूजन करून केली. यावेळी विविध संस्थांचे प्रतिनिधी आणि ग्रामस्थ मोठ्या संख्येने उपस्थित होते.

सदर शिबिराचे आयोजन दुर्गरक्षक प्रतिष्ठान, माऊली युवा प्रतिष्ठान रेडी, लोकमान्य मल्टीपर्पज को-ऑप. सोसायटी लि. (मल्टी स्टेट), मातोश्री सेवाधाम आरोग्य सेवा ट्रस्ट, मुंबई आणि SSPM मेडिकल कॉलेज व हॉस्पिटल, पडवे रक्तपेढी यांच्या संयुक्त विद्यमाने करण्यात आले होते. रेडी ग्रामपंचायत सभागृह येथे सोमवार, दिनांक १६ मार्च २०२६ रोजी सकाळी १० ते संध्याकाळी ४ वाजेपर्यंत हे शिबीर पार पडले. याप्रसंगी आयोजित रक्तदान शिबिरात ३० रक्तदात्यांनी रक्तदान करून छत्रपती श्री संभाजी महाराजांना आगळीवेगळी श्रद्धांजली अर्पण केली.

आरोग्य शिबिराचा भाग म्हणून आयोजित नेत्र तपासणी शिबिराचा लाभ रेडी पंचक्रोशीतील २४० नागरिकांनी घेतला. या शिबिरात गरजू रुग्णांना केवळ १८० रुपयांत दर्जेदार चष्म्यांचे वाटप करण्यात आले. हे दोन्ही उपक्रम यशस्वी करण्यासाठी नाना राऊळ, सचिन कोंडये, उतेज परब, सुनील मुळीक, जयवंत मुळीक, गौरी जुवेकर, डॉ. केतन सोनी यांच्यासह दुर्गरक्षक प्रतिष्ठान, माऊली युवा प्रतिष्ठान आणि मातोश्री सेवाधाम आरोग्य सेवा ट्रस्टच्या सर्व सक्रिय कार्यकर्त्यांनी विशेष परिश्रम घेतले. रेडी पंचक्रोशीतील ग्रामस्थांच्या सहकार्यामुळे हे सामाजिक कार्य यशस्वीरित्या संपन्न झाले.