..तर उपाध्यक्ष पदी शिंदे सेनेचे तुकाराम उर्फ दादा साईल
सिंधुदुर्गनगरी,दि.१६: सिंधुदुर्ग जिल्हा परिषदेच्या रिक्त असलेल्या अध्यक्ष आणि उपाध्यक्ष पदासाठी आज निवडणूक प्रक्रिया पार पडली असून, यामध्ये सत्ताधारी महायुतीने आपले वर्चस्व कायम राखले आहे. जिल्हा परिषदेच्या अध्यक्षपदी भारतीय जनता पक्षाचे प्रमोद कामत यांची बिनविरोध निवड करण्यात आली आहे, तर उपाध्यक्ष पदाची माळ शिंदे यांच्या शिवसेनेचे तुकाराम उर्फ दादा साईल यांच्या गळ्यात पडली आहे.
जिल्हा परिषद सभागृहात दुपारी ३.३० वाजता पीठासीन अधिकारी शुभांगी साठे यांच्या अध्यक्षतेखाली ही विशेष सभा आणि निवड प्रक्रिया पार पडली. अध्यक्ष आणि उपाध्यक्ष या दोन्ही पदांसाठी प्रत्येकी एकच अर्ज आल्याने ही निवड बिनविरोध झाल्याची अधिकृत घोषणा पीठासीन अधिकाऱ्यांनी केली. या निवडीनंतर महायुतीच्या कार्यकर्त्यांनी जिल्हा परिषद परिसरात एकच जल्लोष केला. प्रमोद कामत आणि दादा साईल यांच्या रूपाने जिल्ह्याच्या विकासाला नवी गती मिळेल, असा विश्वास यावेळी उपस्थित लोकप्रतिनिधी आणि कार्यकर्त्यांनी व्यक्त केला आहे.