सावंतवाडी,दि.१६: स्व. श्रीमंत कमलाबाई दत्ताजीराव भोसले तळीकर प्रतिष्ठान व सावंतवाडी नगरपरिषदेच्या ‘माझी वसुंधरा अभियान’ यांच्या संयुक्त विद्यमाने, स्व. प्रा. मिलिंद दत्ताजीराव भोसले यांच्या स्मृतीप्रीत्यर्थ आयोजित ‘आपण व्यक्त होऊया!’ या तालुकास्तरीय रंगभरण व चित्रकला स्पर्धेला विद्यार्थ्यांचा उदंड प्रतिसाद मिळाला. जनरल जगन्नाथराव भोसले शिव उद्यान येथे ही स्पर्धा मोठ्या उत्साहात पार पडली. या स्पर्धेत सहभागी होत विद्यार्थ्यांनी आपल्या कल्पनाशक्तीचे रंग कागदावर उमटवले.
इयत्ता पहिली ते दुसरीसाठी आयोजित रंगभरण स्पर्धेत धन्विका सचिन मुळीक हिने प्रथम क्रमांक पटकावला, तर हर्षिता प्रवीण मुळीक हिने द्वितीय आणि स्वराली विश्वेश पांगम हिने तृतीय क्रमांक मिळवला. हार्दिक अमोल भिरवंडेकर व दिक्षा पराग टिळवे यांना उत्तेजनार्थ क्रमांक देऊन गौरविण्यात आले. तसेच इयत्ता तिसरी व चौथीसाठीच्या चित्रकला स्पर्धेत प्रार्थना प्रणय नाईक प्रथम, सार्थक स्नेहल मालवणकर द्वितीय, तर आराध्या अभिजित चव्हाण तृतीय क्रमांकाची मानकरी ठरली. या गटात आरोही विनोद गावडे आणि अन्वी विनोद गावडे यांनी उत्तेजनार्थ यश संपादन केले. कलाशिक्षक बी. व्ही. मालवणकर व चित्रकार अक्षय सावंत यांनी स्पर्धेचे परीक्षण केले.
या कार्यक्रमाचे खास आकर्षण म्हणजे ‘सामाजिक बांधिलकी प्रतिष्ठान, सावंतवाडी’ यांना प्रदान करण्यात आलेला ‘स्व. किशोर दत्ताजीराव भोसले स्मृती आरोग्य व सामाजिक सेवा पुरस्कार’. संस्थेचे सदस्य रवी जाधव, रुपा मुद्राळे, हेलन निब्रे, समीरा खलील आणि लक्ष्मण कदम यांचा यावेळी विशेष सन्मान करण्यात आला. माजी शालेय शिक्षण मंत्री तथा आमदार दीपक केसरकर यांनी स्पर्धेला भेट देऊन शुभेच्छा दिल्या. यावेळी बोलताना केसरकर म्हणाले की, “स्व. प्रा. मिलिंद भोसले यांच्या निधनाने सामाजिक, शैक्षणिक आणि सांस्कृतिक क्षेत्राची मोठी हानी झाली आहे, मात्र त्यांचा हा वारसा भोसले-तळीकर प्रतिष्ठान ज्या पद्धतीने पुढे नेत आहे, ती बाब अत्यंत कौतुकास्पद आहे.”
बक्षीस वितरण समारंभाला सावंतवाडीचे प्र. नगराध्यक्ष ॲड. अनिल निरवडेकर, माजी नगराध्यक्ष संजू परब, माजी प्राचार्य व्ही. बी. नाईक, उद्यान सभापती मोहिनी मडगावकर, सामाजिक कार्यकर्ते ॲड. नकुल पार्सेकर, कोमसाप अध्यक्ष दीपक पटेकर, उपाध्यक्ष अभिमन्यू लोंढे यांसह प्रतिष्ठानचे विश्वस्त अनिल भोसले, संचालिका मंगल भोसले व भोसले कुटुंबातील सदस्य उपस्थित होते. स्पर्धेच्या यशस्वीतेसाठी गौरव भोसले, प्राजक्ता पाटील, सुलक्षणा चव्हाण, शिवम धुरी तसेच ‘आपण व्यक्त होऊया’ समितीच्या सर्वेश राऊळ, अविनाश बांदेकर, समर्थ केळुसकर यांच्यासह सर्व सदस्यांनी विशेष परिश्रम घेतले. कार्यक्रमाचे निवेदन विनायक गांवस यांनी केले, तर आभार प्रदर्शन समिती प्रमुख निरज भोसले यांनी मानले.