सावंतवाडी,दि.२०: अखंड महाराष्ट्राचे आराध्य दैवत छत्रपती शिवाजी महाराज यांच्या जयंतीचे औचित्य साधून सावंतवाडी येथे ‘राजे प्रतिष्ठान कामगार सेना’ आणि ‘राष्ट्रीय छावा संघटना’ महाराष्ट्र राज्य यांच्या वतीने शिवजयंती सोहळा अत्यंत उत्साहात आणि भक्तीमय वातावरणात साजरा करण्यात आला. सिंधुदुर्ग येथील संघटनेच्या कार्यालयात पार पडलेल्या या सोहळ्यात शिवरायांच्या विचारांचा जागर करत विविध कार्यक्रमांचे आयोजन करण्यात आले होते.
या उत्सवाचे मुख्य आकर्षण ठरली ती म्हणजे चिमुकल्या शिवभक्तांची भव्य रॅली. पारंपारिक वेशभूषा परिधान करून, हातात भगवे ध्वज घेऊन सहभागी झालेल्या मुलांनी उपस्थितांचे लक्ष वेधून घेतले. शिवकालीन संस्कृतीचे जतन आणि संवर्धन करण्याच्या उद्देशाने आयोजित या कार्यक्रमात महाराजांच्या पराक्रमाचा इतिहास सांगणारे पोवाडे सादर करण्यात आले. विविध कलाप्रकारांच्या माध्यमातून कलाकारांनी छत्रपतींना मानाची मानवंदना दिली, ज्यामुळे उपस्थित शिवप्रेमींना शिवकालीन इतिहासाचे दर्शन घडले.
या सोहळ्याला संघटनेचे जिल्हाध्यक्ष संतोष तळवणेकर यांच्यासह प्रमुख पदाधिकाऱ्यांची उपस्थिती लाभली होती. यामध्ये जिल्हा प्रवक्ते शिवा गावडे, सहसचिव कल्याण कदम, सचिव रामचंद्र कुडाळकर, खजिनदार ज्ञानेश्वर पारधी, सामाजिक कार्यकर्ते मधुकर तळवणेकर आणि तालुकाध्यक्ष सचिन गावडे यांचा समावेश होता. तसेच श्री. शिवानंद हेडगे, अंजली घाडी, अनिल सावंत यांच्यासह शेकडो शिवप्रेमी व संघटनेचे कार्यकर्ते या सोहळ्याला उपस्थित होते.
यावेळी बोलताना पदाधिकाऱ्यांनी सांगितले की, दरवर्षीप्रमाणे यंदाही अत्यंत भक्तीभावाने आणि उत्साहाने आम्ही शिवजयंती साजरी केली आहे. नव्या पिढीपर्यंत महाराजांचे विचार पोहोचवणे हाच आमचा मुख्य उद्देश असून शिवरायांचा आदर्श सर्वांनी डोळ्यासमोर ठेवावा. या संपूर्ण सोहळ्यादरम्यान कार्यकर्त्यांचा उत्साह ओसंडून वाहत होता. ‘जय भवानी, जय शिवाजी’च्या जयघोषाने संपूर्ण सावंतवाडी परिसर दुमदुमून गेला होता.
