मुंबई, दि.१४: “छत्रपती शिवराय केवळ डोक्यावर घेऊन मिरवण्याचा विषय नसून, त्यांचे विचार डोक्यात घेऊन आचरणात आणणे ही काळाची गरज आहे,” हा संदेश देण्यासाठी नवी मुंबईत शिवजयंतीचा मोठा सोहळा रंगणार आहे. तळोजा येथील केदार सहकारी गृहनिर्माण संस्था (मर्यादित) व केदार सोसायटी सोशल असोसिएशन यांच्या संयुक्त विद्यमाने शुक्रवार, १९ फेब्रुवारी २०२६ रोजी शिवजयंती उत्सवाचे भव्य आयोजन करण्यात आले आहे. या सोहळ्याचे मुख्य आकर्षण म्हणजे महाराष्ट्रातील सुप्रसिद्ध प्रेरणादायी वक्ते तथा शिवव्याख्याते प्रा. रूपेश पाटील (सावंतवाडी) यांचे ‘शिवराय डोक्यावर नव्हे, डोक्यात घ्यायला शिका!’ या विषयावर होणारे धगधगते व्याख्यान.
या मंगल दिनाची सुरुवात सकाळी ९:०० वाजता पल्सर उड्डाण विमानतळ चौक ते केदार सोसायटी कार्यालय दरम्यान निघणाऱ्या भव्य शिवज्योत आगमन सोहळ्याने होईल. त्यानंतर सकाळी १०:०० वाजता छत्रपती शिवाजी महाराजांच्या प्रतिमेचे आणि शिवज्योतीचे विधिवत पूजन करण्यात येईल. सामाजिक बांधिलकी जपत सकाळी १०:०० ते दुपारी २:०० या वेळेत रक्तदान शिबिराचेही आयोजन करण्यात आले आहे.
दुपारनंतरच्या सत्रात सायंकाळी ४:०० वाजता शिवरायांच्या जयघोषात भव्य मिरवणूक काढण्यात येणार असून, त्यानंतर सायंकाळी ६:०० ते ८:०० या वेळेत ‘छत्रपती शिवाजी महाराज आणि गडकिल्ले’ या विषयावर आधारित विविध सांस्कृतिक कार्यक्रम पार पडतील. रात्री ८:०० वाजता मुख्य व्याख्यानाला सुरुवात होईल, ज्यामध्ये प्रा. रूपेश पाटील शिवरायांच्या जीवनाचे विविध पैलू उलगडणार आहेत.
हा संपूर्ण सोहळा प्लॉट क्रमांक ८, सेक्टर २९, तळोजा फेज-२, ता. पनवेल येथे पार पडणार असून, या प्रेरणादायी उत्सवाला केदार सोसायटीतील रहिवाशांसह परिसरातील शिवप्रेमी नागरिकांनी मोठ्या संख्येने उपस्थित राहावे, असे आवाहन आयोजकांतर्फे करण्यात आले आहे.