तळवडे मतदारसंघात महायुतीचा झेंडा; पालकमंत्र्यांसह राणे कुटुंबियांचे मानले आभार
सावंतवाडी,दि.१०: तळवडे जिल्हा परिषद मतदारसंघातून भारतीय जनता पक्षाचे युवा नेते संदीप गावडे यांनी दणदणीत विजय संपादन केला असून, या विजयानंतर त्यांनी आपल्या कृतज्ञतेची भावना एका आगळ्यावेगळ्या पद्धतीने व्यक्त केली आहे. विजयाची अधिकृत घोषणा होताच गावडेंनी भाजप प्रदेशाध्यक्ष रवींद्र चव्हाण यांचा फोटो असलेला आणि त्यावर ‘दैवत’ असा संदेश लिहिलेला बॅनर फडकवून सर्वांचे लक्ष वेधून घेतले. आपल्या या यशाचे संपूर्ण श्रेय त्यांनी रवींद्र चव्हाण यांना दिले असून, हा विजय त्यांनाच कृतज्ञतापूर्वक अर्पण केला आहे.
विजयाची घोषणा झाल्यानंतर तळवडे मतदारसंघात कार्यकर्त्यांनी एकच जल्लोष केला. यावेळी काढण्यात आलेल्या भव्य विजय रॅलीमध्ये कार्यकर्त्यांचा उत्साह शिगेला पोहोचला होता. या रॅलीदरम्यान संदीप गावडे यांनी आपल्या हातातील ‘दैवत’ बॅनर उंचावून आपला विजय साजरा केला. “मी आज जे काही यश मिळवले आहे, त्यामागे खऱ्या अर्थाने रवींद्र चव्हाण यांची ताकद आणि मार्गदर्शन आहे, त्यांच्यामुळेच हा विजय शक्य झाला,” अशा भावना गावडेंनी यावेळी व्यक्त केल्या.
केवळ पक्षांतर्गत नेतृत्वच नव्हे, तर महायुतीच्या एकजुटीमुळे हा विजय सुकर झाल्याचे त्यांनी नमूद केले. यावेळी त्यांनी पालकमंत्री नितेश राणे, खासदार नारायण राणे, आमदार दीपक केसरकर, माजी खासदार निलेश राणे यांच्यासह महायुतीचे सर्व कार्यकर्ते व पदाधिकारी यांचे आभार मानले. हा विजय मतदारसंघातील जनतेचा आणि कार्यकर्त्यांच्या कष्टाचा असल्याचे सांगत संपूर्ण परिसर भाजपमय झाला होता. कार्यकर्त्यांच्या मोठ्या उपस्थितीत पार पडलेल्या या रॅलीने आणि संदीप गावडेंनी प्रदर्शित केलेल्या या ‘दैवत’ बॅनरने संपूर्ण जिल्ह्याचे लक्ष वेधून घेतले आहे.