दोडामार्ग,दि.०७: जिल्हा परिषद आणि पंचायत समिती निवडणुकीच्या रणधुमाळीत आज मतदानाचा दिवस उजाडल्यानंतर राजकीय हालचालींना वेग आला आहे. याच पार्श्वभूमीवर भाजपचे युवा नेते विशाल परब यांनी आज दोडामार्ग तालुक्यातील माटणे जिल्हा परिषद मतदारसंघाचा झंझावाती दौरा केला. त्यांनी माटणे, आयी आणि वझरे येथील विविध मतदान केंद्रांवरील बुथला भेटी देऊन मतदानाचा प्रत्यक्ष आढावा घेतला. यावेळी त्यांनी उपस्थित कार्यकर्त्यांशी संवाद साधत त्यांच्या कामाचे कौतुक केले, ज्यामुळे कार्यकर्त्यांमध्ये मोठा उत्साह पाहायला मिळाला.
या दौऱ्याप्रसंगी विशाल परब यांच्यासोबत दोडामार्गचे नगराध्यक्ष चेतन चव्हाण, माजी तालुकाध्यक्ष रंगनाथ गवस, भाजप युवामोर्चा तालुकाध्यक्ष पराशर सावंत, शिरिष नाईक, प्रितम पोकळे, पंचायत समिती उमेदवार पार्वती गवस, बबलू पांगम, शानी बोर्डेकर, माजी सरपंच महादेव गवस यांसह भाजपचे अनेक पदाधिकारी आणि कार्यकर्ते मोठ्या संख्येने उपस्थित होते. मतदारसंघातील प्रत्येक बुथवर जाऊन परब यांनी नियोजनाची पाहणी केली आणि विजयाचा विश्वास व्यक्त केला. नेत्यांच्या या प्रत्यक्ष भेटीमुळे भर उन्हातही कार्यकर्त्यांचा उत्साह ओसंडून वाहत होता.