सावंतवाडी,दि.०६: जुन्या मुंबई-गोवा महामार्गावरील माजगाव पॅलेस हॉटेल बस स्टॉप परिसरात आज दुपारी एक मोठे झाड अचानक रस्त्यावर कोसळल्याने मोठी खळबळ उडाली. या घटनेमुळे महामार्गावर दोन्ही बाजूंनी मोठी वाहतूक कोंडी निर्माण झाली होती, परिणामी अनेक नागरिक, प्रवासी आणि वाहनचालक तासनतास अडकून पडले होते. मात्र, अशा ऐन संकटाच्या वेळी जिल्हा परिषदेचे उद्धव बाळासाहेब ठाकरे गटाचे उमेदवार दिनेश सावंत यांनी प्रत्यक्ष मैदानात उतरत मदतीचा हात दिला आणि रस्ता मोकळा करून दिला.
घटनेची माहिती मिळताच दिनेश सावंत यांनी कुठलाही विलंब न करता आपल्या सहकाऱ्यांसह तातडीने घटनास्थळी धाव घेतली. केवळ प्रशासनाची वाट न पाहता त्यांनी स्वतः पुढाकार घेतला आणि कोसळलेले झाड तोडून बाजूला करण्याची व्यवस्था केली. त्यांच्या या तत्परतेमुळे काही वेळातच विस्कळीत झालेली वाहतूक पुन्हा सुरळीत झाली आणि प्रवाशांनी सुटकेचा नि:श्वास सोडला.
या बचाव कार्यात दिनेश सावंत यांना सरपंच रिचर्ड डिमेलो, सन्या सावंत, राकेश नार्वेकर तसेच स्थानिक ग्रामस्थांनी मोलाचे सहकार्य केले. राजकीय आश्वासनांच्या पलिकडे जाऊन संकटसमयी प्रत्यक्ष कृती करणारे नेतृत्व म्हणून दिनेश सावंत यांनी पुन्हा एकदा आपली ओळख सिद्ध केली आहे. त्यांच्या या कार्यक्षमतेचे आणि सामाजिक बांधिलकीचे माजगाव परिसरातील नागरिकांकडून मोठ्या प्रमाणावर कौतुक केले जात आहे.