सावंतवाडी,दि.०५: इन्सुली जिल्हा परिषद मतदारसंघात निवडणुकीचे वारे वेगाने वाहू लागले असून महायुतीचे अधिकृत उमेदवार शावियर फर्नांडिस यांच्या धडाकेबाज प्रचाराने संपूर्ण मतदारसंघ सध्या ढवळून निघाला आहे. डेगवे, इन्सुली, कास यांसह मतदारसंघातील प्रत्येक गावागावांत त्यांच्या प्रचाराला जनतेचा प्रचंड प्रतिसाद मिळत असून, यामुळे विरोधकांची मोठी धावपळ उडाल्याचे चित्र स्पष्टपणे दिसत आहे.
प्रचार दौऱ्यादरम्यान आबालवृद्ध, युवक-युवती आणि विशेषतः महिला वर्गाकडून शावियर फर्नांडिस यांचे जंगी स्वागत केले जात आहे. “हा उमेदवार आमचाच आहे” अशी एकच भावना सध्या मतदारांमध्ये निर्माण झाली आहे. एक तरुण, तडफदार आणि विकासाभिमुख नेतृत्व म्हणून त्यांच्याकडे पाहिले जात असल्याने, मतदारांनी आतापासूनच त्यांचा “शंभर टक्के विजय निश्चित” असल्याचा ठाम विश्वास व्यक्त केला आहे.
शावियर फर्नांडिस यांनी मतदारसंघातील प्रत्येक गावात प्रत्यक्ष भेटी देऊन आणि पदयात्रांच्या माध्यमातून जनतेसमोर आपला विकासाचा ठोस अजेंडा मांडला आहे. रस्ते, पाणी, आरोग्य, शिक्षण आणि रोजगार यांसारख्या मूलभूत प्रश्नांवर त्यांनी दिलेली स्पष्ट आश्वासने मतदारांना भावली असून, यामुळे महायुतीच्या प्रचाराला एक वेगळीच धार प्राप्त झाली आहे.
एकीकडे शावियर फर्नांडिस यांच्या समर्थकांची संख्या आणि प्रचाराची लाट दिवसेंदिवस वाढत असताना, दुसरीकडे मात्र विरोधकांचा प्रभाव कमी होत चालल्याचे चित्र आहे. इन्सुली मतदारसंघात आता केवळ “फर्नांडिस यांचा विजय अटळ” अशीच चर्चा सर्वत्र रंगू लागली असून महायुतीने या मतदारसंघात मोठी आघाडी घेतल्याचे मानले जात आहे.
