सावंतवाडी,दि.०३: सांस्कृतिक वारसा लाभलेल्या सावंतवाडी तालुक्यातील मळगाव येथे ‘उदय जामदार अचानक मित्र मंडळ’ व ‘अचानक महिला मित्र मंडळ’ यांच्या संयुक्त विद्यमाने पहिल्यांदाच कराओके गायन स्पर्धेचे दिमाखदार आयोजन करण्यात आले. या अभिनव उपक्रमाला मळगाववासीयांनी आणि रसिक प्रेक्षकांनी उत्स्फूर्त प्रतिसाद दिला असून, पहिल्याच वर्षी या स्पर्धेने मोठी लोकप्रियता मिळवली आहे.
या स्पर्धेमध्ये गावातील अनेक नवोदित आणि अनुभवी गायकांनी आपला सहभाग नोंदवला. यात अभिषेक परब, प्रितेश दाभोलकर, काव्या गावडे, अजित सावंत, अनिल यादव, तन्वी गोसावी, प्रशांत मांजरेकर, गौतम सावंत, मुग्धा गोसावी, पांडुरंग बुगडे, ओमकार मेस्त्री, गायत्री वाळवे, सुभाष सावळ, सुनील गोवेकर, नेहा भांगले, संदीप खानोलकर आणि मंदार बर्डे यांनी एकापेक्षा एक सरस गाणी सादर करून उपस्थितांची मने जिंकली. सुरांच्या या महफिलीमुळे संपूर्ण मळगाव परिसर मंत्रमुग्ध झाला होता.
स्पर्धेचा निकाल आणि पारितोषिक वितरण: अत्यंत चुरशीच्या झालेल्या या स्पर्धेत कु. तन्वी गोसावी हिने आपल्या सुरेल गायकीच्या जोरावर प्रथम क्रमांक पटकावला. तिला हनुमंत पेडणेकर पुरस्कृत ३,३३३ रुपयांचे रोख पारितोषिक देऊन गौरविण्यात आले. द्वितीय क्रमांक कु. स्वराज धुरी (२,२२२ रुपये, बाळू गावडे पुरस्कृत) याने मिळवला, तर तृतीय क्रमांकाचा मानकरी प्रितेश दाभोलकर (१,१११ रुपये, अमर वेंगुर्लेकर पुरस्कृत) ठरला. याशिवाय सुनील गोवेकर, मुग्धा गोसावी व अजित साया यांना उत्तेजनार्थ पारितोषिके देऊन प्रोत्साहित करण्यात आले.
कार्यक्रमाचे परीक्षक म्हणून अमित लाखे यांनी काम पाहिले, तर मारुती पाटील यांनी आपल्या ओघवत्या शैलीत सूत्रसंचालन करून कार्यक्रमात रंगत भरली. या यशस्वी आयोजनामुळे मळगावच्या सांस्कृतिक क्षेत्रात एका नव्या पर्वाची सुरुवात झाली असून, अशा उपक्रमांमुळे स्थानिक कलागुणांना हक्काचे व्यासपीठ मिळत असल्याची भावना ग्रामस्थांनी व्यक्त केली आहे.