कणकवली,दि.०१: सिंधुदुर्ग जिल्ह्याच्या राजकारणातील एक मोठे प्रस्थ आणि जिल्हा बँकेचे माजी अध्यक्ष सतीश सावंत यांनी अखेर ‘मशाल’ सोडून ‘कमळ’ हाती घेतले आहे. रविवारी कणकवलीतील हरकुळ बुद्रुक येथे झालेल्या एका भव्य सोहळ्यात पालकमंत्री नितेश राणे यांच्या उपस्थितीत त्यांनी भारतीय जनता पार्टीत जाहीर प्रवेश केला. जिल्हा परिषद निवडणुकांच्या तोंडावर ठाकरे शिवसेनेसाठी हा मोठा धक्का मानला जात असून, या प्रवेशामुळे जिल्ह्याच्या राजकीय समीकरणांत मोठी उलथापालथ झाली आहे.
या सोहळ्यात केवळ सतीश सावंतच नव्हे, तर त्यांच्यासोबत हरकुळ बुद्रुक जिल्हा परिषद मतदार संघातील १५० प्रमुख पदाधिकारी आणि हजारो कार्यकर्त्यांनी भाजपचा झेंडा हाती घेतला. यामध्ये हरकुळ खुर्द सोसायटीचे व्हाइस चेअरमन नित्यानंद चिंदरकर, ग्रामपंचायत सदस्य मंजुषा पारकर, अर्चना घाडीगावकर, अंकिता सावंत, माजी सरपंच संदीप रासम, राजेंद्र ढवण, नागवे माजी सरपंच बाळा सावंत, चंद्रकांत सावंत, अजय सावंत यांसारख्या दिग्गज स्थानिक नेत्यांचा समावेश आहे. या ऐतिहासिक क्षणी भाजपचे जिल्हाध्यक्ष प्रभाकर सावंत, तालुका अध्यक्ष मिलिंद मेस्त्री, दिलीप तळेकर, मनोज रावराणे, आणि बबलू सावंत यांसह भाजपचे अनेक वरिष्ठ नेते उपस्थित होते.
जुने ऋणानुबंध पुन्हा जागले: ‘घरवापसी’ची चर्चा सतीश सावंत हे एकेकाळी राणे कुटुंबाचे अत्यंत विश्वासू सहकारी म्हणून ओळखले जात होते. मात्र, मधल्या काळात आलेल्या राजकीय मतभेदांमुळे त्यांनी ठाकरे गटात प्रवेश केला होता. आता पुन्हा एकदा मंत्री नितेश राणे यांच्या नेतृत्वाखाली भाजपमध्ये परतल्याने राजकीय वर्तुळात “सावंतांची घरवापसी” झाल्याची चर्चा रंगली आहे. या प्रवेशामुळे कणकवली मतदारसंघात भाजपची ताकद आता दुपटीने वाढली असल्याचे बोलले जात आहे.
ठाकरे शिवसेनेची स्थानिक फळी खिळखिळी सतीश सावंत हे ठाकरे शिवसेनेचे कणकवली विधानसभा अध्यक्ष म्हणून जबाबदारी सांभाळत होते. त्यांच्यासोबत हरकुळ बुद्रुकचे सरपंच आनंद ठाकूर, भिरवडे सरपंच नितीन सावंत, बेनी डिसोझा आणि माजी पंचायत समिती सदस्य मंगेश सावंत यांसारख्या महत्त्वाच्या मोहऱ्यांनी पक्ष सोडल्याने ठाकरे गटाची स्थानिक फळी पूर्णपणे खिळखिळी झाली आहे. आगामी निवडणुकांच्या रणधुमाळीपूर्वीच नितेश राणे यांनी केलेल्या या ‘धमाक्या’मुळे विरोधकांचे धाबे दणाणले आहेत.
सहकार क्षेत्रातील समीकरणे बदलणार जिल्हा बँकेचे माजी अध्यक्ष म्हणून सतीश सावंत यांचा सहकार क्षेत्रावर मोठा प्रभाव आहे. त्यांनी भाजपमध्ये प्रवेश केल्यामुळे जिल्हा बँक, विविध विकास सोसायट्या आणि ग्रामीण भागातील अर्थकारणावर भाजपचे वर्चस्व अधिक घट्ट होणार आहे. विकासकामांचा वेग वाढवण्यासाठी आणि कोकणच्या प्रगतीसाठी आपण भाजपमध्ये प्रवेश केल्याचे संकेत यावेळी सावंत समर्थकांकडून देण्यात आले.
