सावंतवाडी,दि.०१: न्हावेली पंचायत समिती मतदारसंघातील निवडणुकीचे रणकंदन आता खऱ्या अर्थाने पेटले असून, महाविकास आघाडीचे उमेदवार पीटर फर्नांडिस यांनी प्रचाराचा धडाका लावत मतदारांचे लक्ष वेधून घेतले आहे. फर्नांडिस यांनी आपल्या झंझावाती प्रचार दौऱ्याच्या माध्यमातून संपूर्ण मतदारसंघ पिंजून काढण्यास सुरुवात केली असून, ठिकठिकाणी त्यांचे जंगी स्वागत होत आहे. केवळ सभांवर भर न देता त्यांनी प्रत्यक्ष ‘घरोघरी भेट’ या मोहिमेवर भर दिल्याने मतदारांशी त्यांचा थेट आणि जिव्हाळ्याचा संवाद साधला जात आहे.
या प्रचार दौऱ्यादरम्यान फर्नांडिस यांनी देशाच्या जडणघडणीत काँग्रेसने दिलेल्या ऐतिहासिक योगदानाची आठवण करून दिली, तसेच महाविकास आघाडीची भविष्यातील विकासाची उद्दिष्टे मतदारांसमोर स्पष्टपणे मांडली. गावपातळीवरील प्रलंबित प्रश्न, पायाभूत सुविधांचा अभाव, रोजगार निर्मिती, शिक्षण आणि आरोग्य सुविधा यांसारख्या मूलभूत विषयांना त्यांनी आपल्या अजेंड्यात प्राधान्य दिले आहे. न्हावेली मतदारसंघातील आरोस, पाडलोस, साटेली आणि दांडेली या प्रमुख भागांमध्ये फर्नांडिस यांचा दौरा पोहोचला असता, तेथील नागरिकांनी मोठ्या संख्येने उपस्थित राहून त्यांना आपला पाठिंबा दर्शविला.
मतदारांच्या समस्या शांतपणे ऐकून घेत त्यावर ठोस उपाययोजना करण्याचे आश्वासन फर्नांडिस देत असल्याने, त्यांच्याबद्दल विश्वासाचे वातावरण निर्माण झाले आहे. नागरिकांचा वाढता सहभाग आणि उत्साहामुळे या मतदारसंघात निवडणुकीचे वातावरण पूर्णपणे तापले असून, पीटर फर्नांडिस यांच्या सक्रियतेमुळे विरोधकांसमोर मोठे आव्हान उभे राहिले आहे. येत्या काही दिवसांत हा प्रचार अधिकच आक्रमक होणार असून, मतदारसंघातील राजकीय समीकरणे कोणाच्या बाजूने झुकणार, याकडे सर्वांचे लक्ष लागले आहे.
