सावंतवाडी,दि. ३१ : माजगाव जिल्हा परिषद निवडणुकीच्या पार्श्वभूमीवर राजकीय वातावरण चांगलेच तापू लागले असून, शिवसेना (उद्धव बाळासाहेब ठाकरे) पक्षाचे अधिकृत उमेदवार दिनेश बाबली सावंत यांना खोतवाडा ग्रामस्थांनी आपला जाहीर पाठिंबा दिला आहे. या निवडणुकीत सावंत यांनाच बहुमताने विजयी करण्याचा ठाम निर्धार ग्रामस्थांनी व्यक्त केल्यामुळे त्यांची बाजू अधिक भक्कम झाल्याचे पाहायला मिळत आहे.
खोतवाडा येथे आयोजित करण्यात आलेल्या एका विशेष बैठकीत ग्रामस्थ मोठ्या संख्येने उपस्थित होते. यावेळी उपस्थित सर्वांनी दिनेश सावंत यांच्या नेतृत्वावर विश्वास व्यक्त करत, आम्ही कायम त्यांच्या पाठीशी ठामपणे उभे राहू, अशी ग्वाही दिली. या बैठकीत निवडणुकीच्या रणनीतीवर सविस्तर चर्चा करण्यात आली असून प्रचाराची दिशा कशी असावी आणि एकत्रितपणे कसे प्रयत्न करावेत, यावरही ग्रामस्थांनी आपले मत मांडले.
खोतवाडा येथील या एकमुखी पाठिंब्यामुळे निवडणूक रिंगणात दिनेश सावंत यांचे पारडे जड झाले असून, मतदारसंघातील इतर भागातही याचे सकारात्मक पडसाद उमटताना दिसत आहेत. या निर्धारामुळे विरोधकांसमोर मोठे आव्हान उभे राहिले असून, प्रत्यक्ष निवडणुकीत याचे रूपांतर मोठ्या मताधिक्यात करण्यासाठी ग्रामस्थ आता सज्ज झाले आहेत.