सावंतवाडी,दि.२४: ज्युनियर चेंबर इंटरनॅशनल (JCI) सावंतवाडीच्या पदाधिकाऱ्यांनी सावंतवाडीच्या नगराध्यक्ष श्रद्धाराजे भोसले यांची नुकतीच सदिच्छा भेट घेतली. या विशेष भेटीप्रसंगी युवराज लखमराजे भोसले हे देखील उपस्थित होते. या भेटीदरम्यान JCI संस्थेची ध्येयधोरणे, युवक सक्षमीकरणासाठी सुरू असलेले उपक्रम तसेच शहरात राबविण्यात येणाऱ्या विविध सामाजिक व विकासात्मक प्रकल्पांची सविस्तर माहिती नगराध्यक्षांना देण्यात आली.
JCI सावंतवाडी शहराच्या सर्वांगीण विकासासाठी सातत्याने कार्यरत असून, विविध समाजोपयोगी उपक्रमांच्या माध्यमातून युवकांमध्ये नेतृत्व गुण, सेवाभाव आणि सामाजिक जबाबदारीची जाणीव निर्माण करण्याचा संस्थेचा प्रामाणिक प्रयत्न आहे, असे यावेळी पदाधिकाऱ्यांनी स्पष्ट केले. जेसीआयच्या या विधायक कार्याची दखल घेत नगराध्यक्ष श्रद्धाराजे भोसले यांनी संस्थेच्या कार्याचे विशेष कौतुक केले. शहराच्या सामाजिक, शैक्षणिक आणि युवक विकासासाठी राबविण्यात येणाऱ्या प्रत्येक उपक्रमाला सावंतवाडी नगरपालिकेकडून पूर्ण सहकार्य राहील, असे आश्वासनही त्यांनी यावेळी दिले.
या सदिच्छा भेटीवेळी JCI झोन समन्वयक (झोन ११) JFM सुशांत गोवेकर, JCI सावंतवाडीच्या अध्यक्षा JFM श्रद्धा गोवेकर, सेक्रेटरी JC विनेश तावडे, जनसंपर्क व विपणन संचालक JC सागर चव्हाण आणि व्यवस्थापन उपाध्यक्ष JC मिस्बा शेख आदी पदाधिकारी उपस्थित होते. या भेटीमुळे JCI सावंतवाडी आणि नगरपालिका प्रशासनातील समन्वय अधिक दृढ झाला असून, भविष्यात शहराच्या विकासासाठी विविध उपक्रम प्रभावीपणे राबविण्यास मोठे बळ मिळणार आहे.