सावंतवाडी,दि.२४: सावंतवाडी उपजिल्हा रुग्णालयातील ज्येष्ठ स्त्रीरोग तज्ज्ञ डॉ. ज्ञानेश्वर ऐवळे यांना उपजिल्हा रुग्णालयाच्या वैद्यकीय अधीक्षक (वर्ग एक) या पदावर बढती देण्यात आली आहे. गेल्या काही वर्षांपासून हे पद रिक्त होते, अखेरीस राज्याच्या आरोग्य मंत्र्यांच्या मान्यतेने डॉ. ऐवळे यांची या रिक्त पदावर नियुक्ती करण्यात आली आहे. या नियुक्तीसाठी पालकमंत्री नितेश राणे, आमदार दीपक केसरकर, आमदार रवींद्र चव्हाण, जिल्हा मध्यवर्ती बँकेचे अध्यक्ष मनीष दळवी तसेच युवराज लखमराजे भोसले यांनी विशेष पाठपुरावा व प्रयत्न केले होते.
डॉ. ज्ञानेश्वर ऐवळे हे गेल्या ३० वर्षांपासून सिंधुदुर्ग जिल्ह्यात स्त्रीरोग तज्ज्ञ म्हणून आपली सेवा बजावत आहेत. सन १९९६ पासून त्यांनी सावंतवाडी व दोडामार्ग या दोन तालुक्यांमध्ये आरोग्य क्षेत्रात मोठे योगदान दिले असून, दरमहा सरासरी १०० स्त्री प्रसूती केसेस यशस्वीरीत्या हाताळण्याचा त्यांना प्रदीर्घ अनुभव आहे. त्यांच्या सेवा प्रवासात त्यांनी १९९८ ते २००६ या काळात सावंतवाडी उपजिल्हा रुग्णालयात स्त्रीरोग तज्ज्ञ म्हणून काम पाहिले. त्यानंतर २००६ ते २०१६ या कालावधीत दोडामार्ग येथे, तर २०१६ ते २०१७ या काळात पुन्हा सावंतवाडीत त्यांनी सेवा दिली. २०१७ ते २०२३ या सहा वर्षांच्या कालावधीत त्यांनी दोडामार्ग ग्रामीण रुग्णालयात आपली जबाबदारी चोख पार पाडली. सन २०२३ पासून ते पुन्हा सावंतवाडी उपजिल्हा रुग्णालयात कार्यरत आहेत.
त्यांचा प्रदीर्घ अनुभव, प्रामाणिक सेवा आणि मातृ-शिशू आरोग्य क्षेत्रातील उल्लेखनीय कार्याची दखल घेऊनच त्यांची वैद्यकीय अधीक्षकपदी नियुक्ती करण्यात आली आहे. डॉ. ऐवळे यांच्या निवडीमुळे सावंतवाडी उपजिल्हा रुग्णालयाला पूर्णवेळ वैद्यकीय अधीक्षक लाभले असून, वैद्यकीय वर्तुळासह सर्व स्तरांतून त्यांचे हार्दिक अभिनंदन होत आहे.