राज्यस्तरीय नेमबाजी स्पर्धेत आयुष पाटणकरचा चमकदार विजय – राष्ट्रीय पातळीवर महाराष्ट्राचे नेतृत्व करणार
सावंतवाडी, दि. ०७: सावंतवाडी येथील श्री पंचम खेमराज महाविद्यालयाचा विद्यार्थी कु. आयुष दत्तप्रसाद पाटणकर याने क्रीडा क्षेत्रात सावंतवाडी आणि सिंधुदुर्ग जिल्ह्याचे नाव पुन्हा एकदा उंचावले आहे. महाराष्ट्र राज्य क्रीडा आणि युवक संचालनालय यांच्या वतीने नागपूर येथे दिनांक २७ ऑक्टोबर रोजी पार पडलेल्या १९ वर्षाखालील राज्यस्तरीय शालेय नेमबाजी स्पर्धेत आयुषने ४०० पैकी ३७९ गुण मिळवत प्रथम क्रमांक पटकावून सुवर्णपदकावर आपले नाव कोरले आहे.
या दैदिप्यमान विजयानंतर आयुष आता राष्ट्रीय नेमबाजी स्पर्धेत महाराष्ट्र राज्याचे प्रतिनिधित्व करणार असून, त्याच्याकडून राष्ट्रीय स्तरावरही उत्कृष्ट कामगिरीची अपेक्षा आहे.
नेमबाजीमध्ये आयुषची कामगिरी सातत्याने उत्कृष्ट राहिली आहे. गतवर्षी कोल्हापूर येथे झालेल्या राज्यस्तरीय स्पर्धेतही त्याने ४०० पैकी ३७८ गुण मिळवून सुवर्णपदक जिंकले होते. त्याला यापूर्वीच सिंधुदुर्ग जिल्ह्यातील ‘गुणवंत खेळाडू’ या सन्मानाने गौरविण्यात आले आहे. त्याच्या कठोर मेहनतीमुळे आणि वडिल दत्तप्रसाद पाटणकर यांच्या अथक प्रयत्नांमुळे आयुषची ऑलिम्पिक स्पर्धेसाठी निवड झाली आहे, जो सिंधुदुर्गकरांसाठी अत्यंत अभिमानाचा क्षण आहे.
आयुषच्या या नेत्रदीपक यशाबद्दल सिंधुदुर्ग जिल्हा शिक्षण प्रसारक मंडळाचे अध्यक्ष श्रीमंत खेमसावंत भोसले (राजेसाहेब), चेअरमन सौ. शुभदादेवी भोसले (राणीसाहेब) विश्वस्त युवराज लखमसावंत भोसले, युवराज्ञी श्रद्धाराजे भोसले, संस्थेचे संचालक प्रा. डी. टी. देसाई, सहसंचालक डॉ. शामराव सावंत, संस्थेचे सदस्य सतीश सावंत, जयप्रकाश सावंत, प्राचार्य डॉ. डी. एल. भारमल, कनिष्ठ महाविद्यालयाचे समन्वयक प्रा. व्ही. पी. राठोड, मदर क्वीन्स हायस्कूलच्या मुख्याध्यापिका सौ. अनुजा साळगावकर, तसेच प्रा. एम. ए. ठाकुर आणि पालक दत्तप्रसाद पाटणकर यांनी त्याचे मनःपूर्वक अभिनंदन केले आहे.
